মানকাচৰৰ পৰা অপহৃত যুৱকৰ অৰ্ধগলিত মৃতদেহ উদ্ধাৰ মেঘালয়ত…

ডিজিটেল সংবাদ, দক্ষিণ শালমাৰাঃ দক্ষিণ শালমাৰা-মানকাচৰ জিলাৰ মানকাচৰ থানা এলেকাৰ অসম-মেঘালয় সীমান্তৰ্তী মহিশঘুমা গাঁৱৰ পৰা অপহৰণ হোৱা এজনৰ অৰ্ধ গলিত মৃতদেহ মঙলবাৰে পুৱতি নিশা চুবুৰীয়া ৰাজ্য মেঘালয়ৰ দক্ষিণ-পশ্চিম গাৰো পাহাৰ জিলাৰ জিক জাকত উদ্ধাৰ হোৱাৰ লগতে আৰক্ষীয়ে ইতিমধ্যে ৭ অপহৰণকাৰীক গ্ৰেপ্তাৰ কৰিছে।

উল্লেখযোগ্য যে, যোৱা ২০ অক্টোবৰ তাৰিখে মানকাচৰৰ কালাপানী আৰক্ষী চকী এলেকাৰ অধীনস্থ মহিশঘুমা গাওঁৰ ৰফিকুল ইছলাম পুত্ৰ ইমদাদ হুছেইনক ১১ জনীয়া দৃবৃত্তৰ দল এটা অপহৰণ কৰে। জানিব পৰা মতে, যুৱক জনৰ সহযোগী একাংশই ঘৰৰ পৰা মাতি নি অপহৰণ কৰে। ইয়াৰ পাছতেই পৰিয়ালৰ লোক যোৱা ২১ অক্টোবৰ তাৰিখে কালাপানী আৰক্ষী চকীত এটি এজাহাৰ দাখিল কৰাত আৰক্ষীয়ে ঘটনাৰ অনুসন্ধান আৰম্ভ কৰে।

আৰক্ষীয়ে ঘটনাক লৈ যোৱা পৰহি দিনা ৪ জনক কৰায়ত্ব কৰাৰ পাছত আজি নিশাৰ ভাগত দুজনক কৰায়ত্ব কৰে। উক্ত ৬ জনক জিলা আৰক্ষীয়ে মাৰাথন জেৰা চলোৱাৰ পাছত যুৱক জনক অপহৰণ কৰি মেঘালয়লৈ নি হত্যা কৰাৰ স্বীকাৰোক্তি দিয়াৰ পাছত জিলা আৰক্ষীৰ দল এটা মেঘালয় আৰক্ষীৰ সহযোগত মঙলবাৰে পুৱতি নিশাৰ চুবুৰীয়া ৰাজ্য খনৰ জিক জাকত উপস্থিত হয়। ঘটনাস্থলীত গৈ আন এজনক গাৰো অপহৰণকাৰীক কৰায়ত্ব কৰাৰ পাছত জিকজাকৰ ডোমাপাৰা কমিউনিটি ৰিজাৰ্ভ ফৰেষ্টৰ পৰা অপহৃত যুৱক জনৰ মৃতদেহ উদ্ধাৰ কৰিবলৈ সক্ষম হয়।

ঘটনাস্থলীত উপস্থিত জিলা আৰক্ষীৰ অতিৰিক্ত আৰক্ষী অধীক্ষক ৰাজেন্দ্ৰ ওজা কয় যে ২০ অক্টোবৰত অপহৰণ হোৱাৰ পাছত পৰিয়ালৰ লোকে ২১ অক্টোবৰ তাৰিখে কালাপানী আৰক্ষী চকীত এজাহাৰ দাখিল কৰে। ইয়াৰ পাছতেই আৰক্ষী ঘটনাৰ অনুসন্ধান আৰম্ভ কৰি মুঠ ৭ জনক গ্ৰেপ্তাৰ কৰা। আৰক্ষীয়ে গ্ৰেপ্তাৰ কৰা অপহৰণকাৰী কেইজন ক্ৰমে আমিনুল ইছলাম, ছাইফুল ইছলাম, বাহাৰুল ইছলাম, গোলাম ৰব্বানী, নমেজ গাৰো, আহমেদ হুছেইন আৰু সমৰেশ ওৰফে সমৰাট এম মাৰাক বুলি চিনাক্ত কৰা হৈছে।

আৰক্ষী সূত্ৰে প্ৰকাশ কৰা মতে অপহৰণকাৰী দলটো যুৱক জনক অপহৰণ কৰি ধন দাবীৰ চেষ্টা চলাইছিল যদিও ধন দাবী কৰাৰ পূৰ্বেই ৰহস্যজনক বাবে যোৱা ২৬ অক্টোবৰ তাৰিখে যুৱক জনক হত্যা কৰি হাবিৰ মাজত পেলাই দিয়ে। ইতিমধ্যে মৃতদেহটি গেলি পচি নষ্ট হৈ পৰিছে। মঙলবাৰে আৰক্ষীয়ে মৃতদেহ উদ্ধাৰ কৰি মৰনোত্তৰ পৰীক্ষা ঘটনাস্থলীতে সম্পন্ন কৰি মৃতদেহ পৰিয়ালৰ লোকক গতাই দিয়াৰ ব্যৱস্থা কৰিছে।

কিন্তু তাৎপৰ্যপূৰ্ণ বিষয় এয়া যে- পুনৰ অসম-মেঘালয় সীমান্তৱৰ্তী এলেকা তথা মেঘালয়ত অসমৰ লোকক অপহৰণৰ ঘটনা বৃদ্ধি পাবলৈ ধৰিছে। যোৱা প্ৰায় ৬ বছৰ পূৰ্বে মেঘালয়ত অসমৰ ব্যৱসায়ী সকলক গাৰো উগ্ৰপন্থীয়ে অপহৰণ কৰি মানকাচৰৰ কেবাজনো ব্যৱসায়ীক হত্যা কৰি ঘন জঙ্গলত পেলাই দিয়াৰ ঘটনা সংঘটিত হোৱাৰ পাছত মেঘালয়ৰ সৈতে মানকাচৰৰ পৰা অসহযোগ আন্দোলন আৰম্ভ কৰা হৈছিল। পৰবৰ্তী সময়ত গাৰো নেশ্বনেলিষ্ট লিবাৰেশ্বন আৰ্মী চমুকৈ জিএনএলএৰ মুখ্য সেনাধক্ষ্য শোহান ডি শ্বীৰা আৰক্ষীৰ অভিযানৰ জৰিতে নিহত হোৱাত এনে ঘটনা হ্ৰাস পাইছিল যদিও এনে ঘটনা পুনৰ বৃদ্ধি পোৱা কাৰ্যই মানকাচৰৰ ব্যৱসায়ী মহলত তীব্ৰ আতংকৰ সৃষ্টি হৈছে।