অসম-অৰুণাচল সীমান্তৰ এখন গাওঁক পৰ্যটনস্থলী ৰূপে গঢ়িবলৈ উপস্থিত এন এচ এচৰ শিক্ষাৰ্থী…

ডিজিটেল সংবাদ,বিশ্বনাথ : এখন গাঁও। বিশ্বনাথ চাৰিআলি নগৰৰ পৰা ২০ কিলোমিটাৰ উত্তৰে অসম অৰুণাচল প্ৰদেশ সীমান্তত অৱস্থিত কাৰ্বি ব্লকৰ এই গাও খনত নাই কোনো অত্যাধুনিক সা সুবিধা, নাই কোনো বিদ্যুৎ যোগান। কিন্তু শীঘ্ৰেই এই গাঁও খনলৈ আহিব দেশ বিদেশৰ পৰ্যটক। কিয়নো অতি পিছপৰা এই গাওখনকে অসমৰ ভিতৰত এখন আদৰ্শ গাঁও হিচাপে গঢ়ি তোলাৰ লগতে পৰ্যটনথলী হিচাপে গঢ় দিবলৈ আগবাঢ়ি আহিছে বিশ্বনাথ মহাবিদ্যালয়ৰ ৬০ গৰাকী এন এচ এচৰ শিক্ষাৰ্থী।

যোৱা তিনিদিন ধৰি এই ৬০ গৰাকী ছাত্ৰ ছাত্ৰীয়ে অধ্যাপক ৰাজেশ্বৰ বড়োৰ নেতৃত্বত আৰু অধ্যক্ষ ড° চিন্তামনি শৰ্মাৰ তত্বাৱধানত তথা গাওবাসীৰ সহযোগত গাওঁখনক পৰ্যটনথলী ৰূপে গঢ় দিবলৈ আৰম্ভ কৰিছে। প্ৰথমে শিক্ষাৰ্থী সকলে গাওঁখনৰ সকলো ঠাই চাফচিকুন কৰি ৰাজ্যৰ ভিতৰতে এখন স্বচ্ছ গাৱৰ মৰ্য্যদা লাভ কৰাৰ চেষ্টা চলাইছে। অহা ব'হাগ মাহৰ ভিতৰত পৰ্যটনৰ কেন্দ্ৰবিন্দু ৰূপে গঢ়ি তোলাৰ লক্ষ্য ৰখা গাঁওখনত কাষৰে বৈ যোৱা পথাইজান নদীত থাকিব নৌকা বিহাৰৰ সুবিধা, পৰ্যটকৰ নৈশ যাপনৰ বাবে থাকিব ৫ টাকৈ বিশাল চাংঘৰ। লগতে থাকিব জনজাতীয় খাদ্য সম্ভাৰ।

উল্লেখ্য যে শব্দ প্ৰদূষণ মুক্ত এই গাওখনলৈ ব'হাগ মাহত বিভিন্ন প্ৰজাতিৰ পৰভ্ৰমী চৰাই আহে। সেই চৰাই সমুহো চাব পাৰিব পৰ্যটকে। লগতে অবিৰাম ভাবে চলি থাকিব জনজাতীয় সাংস্কৃতিক কাৰ্যসূচী। পথাইলাংচ' উদ্যান হিচাপে নামাকৰণ কৰা এই গাঁওখনক লৈ এতিয়া এন এচ এচৰ শিক্ষাৰ্থী সকলৰ লগতে সমগ্ৰ গাঁওবাসী আশাবাদী। উল্লেখ্য যে বিশ্বনাথ মহাবিদ্যালয়ত অনুষ্ঠিত হোৱা ৰাষ্ট্ৰীয় সেৱা আঁচনিৰ অধীনত সাতদিনীয়া বিশেষ শিৱিৰত অংশগ্ৰহন কৰাৰ পিছতে শিক্ষাৰ্থী সকল এনেদৰে আগবাঢ়ি অহাত সীমান্তবৰ্তী অঞ্চলটোলৈ কঢ়িয়াই আনিছে আশাৰ ৰেঙণি।