নাগালেণ্ডৰ নকলাকত সেনা বাহিনীৰ শিবিৰত এন এছ চি এন খাপলাং গোটৰ আক্ৰমণ…

ডিজিটেল সংবাদ, ৱাখাঃ সমগ্ৰ দেশজুৰি ৭০ সংখ্যক স্বাধীনতা দিৱস উদযাপন কৰি থকাৰ সময়তে শনিবাৰে নগালেণ্ডৰ ভাৰত-ম্যানমাৰ সীমান্তৰ নাকলাক জিলাত থকা সেনা বাহিনীৰ শিবিৰত ভয়ংকৰ আক্ৰমণ চলোৱাৰ খবৰ আহিছে।

প্ৰাপ্ত খবৰ মতে শনিবাৰে দুপৰীয়া নাকলাকৰ আই টি চিৰ সমীপত থকা সেনাৰ শিবিৰত ম্যানমাৰস্থিত নগা বিদ্ৰোহী সংগঠন এন এছ চি এন খাপলাং গোটৰ গেৰিলা কেডাৰে স্বয়ংক্ৰিয় ৰাইফলেৰে ধাৰাসাৰ গুলীবৰ্ষণ কৰে ।

সেনাই ওলোটাই গুলীবৰ্ষণ কৰাত দুয়োপক্ষৰ মাজত বহু সময় ধৰি প্ৰচণ্ড গুলীয়াগুলি চলে। এই ঘটনাৰ পাছত সেনাৰ আৰু নগা আৰক্ষীৰ উচ্চপদস্থ বিষয়া উপস্থিত হৈ বিদ্ৰোহীৰ সন্ধানত অভিযান আৰম্ভ কৰা লগতে খালী কাৰ্টিজ উদ্ধাৰ কৰিছে। অৱশ্যে এতিয়ালৈকে কোনোপক্ষৰে হতাহত খবৰ অহা নাই যদিও এন এছ চি এন খাপলাং গোটে সংঘটিত কৰা বুলি দায়িত্ব স্বীকাৰ কৰিছে।