নেলীৰ আমলীঘাটত পথ দুৰ্ঘটনা, থিতাতে নিহত ব্যৱসায়ী…

ডিজিটেল সংবাদ, মায়ংঃ আজি সন্ধিয়াৰ ভাগত জাগীৰোডৰ নেলী আৰক্ষী চকীৰ অন্তৰ্গত আমলিঘাটত সংঘটিত এক শোকাৱহ পথ দুৰ্ঘটনাত এজন ব্যৱসায়ী থিতাতে নিহত হয়। নিহত ব্যৱসায়ী জন ভৱতোষ দত্ত বুলি জানিব পৰা গৈছে। ঘটনা সন্দৰ্ভত নেলী আৰক্ষী চকীৰ ভাৰপ্ৰাপ্ত বিষয়া সমীৰ কোঁৱৰৰ পৰা জানিব পৰা মতে, নেলী সাপ্তাহিক বজাৰৰ পৰা ঘৰলৈ উভতাৰ পথত ৰাষ্ট্ৰীয় ঘাই পথৰ ওপৰত এখন বাহনৰ পৰা বাগৰি পৰি মৃত্যু হয় ভৱতোষ দত্তৰ আৰু চাৰি জন আহত হয়।

বজাৰ সামৰি AS-01MC-5859 নম্বৰৰ সামগ্ৰী কঢ়িওৱা মহিন্দ্ৰা মেক্সিম' বাহনখনত সতীৰ্থ ব্যৱসায়ী সকলৰ সৈতে সামগ্ৰীৰ ওপৰত বহি গৈ থকা সময়তে হঠাতে বাহন খন এঢলীয়া হৈ পৰে আৰু বাহন খনৰ পৰা সৰি পৰে আটাইকেইজন। সেই সময়তে পিছফালৰ পৰা অহা কোনোবা অচিনাকি বাহনে মহতিয়াই থৈ যোৱা বুলি সন্দেহ কৰা হয়। ভৱতোষ দত্তৰ মৃত্যুত শোক প্ৰকাশ কৰিছে জাগীৰোডৰ বিভিন্ন জনে। আহত আন ব্যৱসায়ী কেইজনৰ ঘৰ ক্ষেত্ৰীত।