ডিজিটেল সংবাদ, নগাঁওঃ নগাঁৱত মেচিন চালিত কুঁহিয়া পেৰা বাহনে ত্ৰাসৰ সৃষ্টি কৰিছে । অতি ব্যস্ত চহৰ নগাঁৱত পুৱাই উলাই আহে অসংখ্য মেচিন চালিত কুঁহিয়া পেৰা বাহন।
এই বাহন সমূহ এতিয়া চিন্তাৰ কাৰণ হৈ পৰিছে । ঘন্টাত ৩০ কি: মি: বেগেৰে চলা ডিজেল চালিত মেচিনৰ সহায়ত নিৰ্মাণ কৰা এই বাহন সমূহৰ নাই কোনো বিভাগীয় অনুমতি, নাই ৰেজিষ্ট্ৰেছন নম্বৰ, নাই ইঞ্চুৰেঞ্চৰ ব্যৱস্থা নাই কোনো প্ৰদূষণ মুক্ত প্ৰমান পত্ৰ ।
চালকৰো নাই কোনো ধৰণৰ অনুজ্ঞাপত্ৰ । এনে অবৈধ বাহনে নগাঁও চহৰ খনত ব্যাপক যানযটৰো সৃষ্টি কৰাৰ লগতে শব্দ আৰু বায়ু প্ৰদূষণৰো সৃষ্টি কৰিছে ।
এই সমূহ বাহনে যদি কোনো অন্য বাহনত খুন্দা মাৰে বা কোনো পথাচাৰীক মহতিয়াই নিয়ে এনেক্ষেত্ৰত ভুক্তভোগীয়ে কোনো ধৰণৰ ক্ষতিপূৰণ লাভ নকৰিব ।
উল্লেখ্যযোগ্য যে পৰিবহন আইন অনুসৰি ৰাজপথত চলা প্ৰতিখন যন্ত্ৰ চালিত, টায়াৰ যুক্ত বাহনৰ ৰেজিষ্ট্ৰেচন, ইঞ্চুৰেঞ্চ থকাটো বাধ্যতামূলক ।
তেনে ক্ষেত্ৰত নগাঁৱত যানবাহন আইন অমান্য কৰি শতাধিক মেচিন চালিত কুঁহিয়া পেৰা বাহন কেনেদৰে ৰাজপথত চলাই আছে সেয়া ৰহস্যৰ আৱৰ্তত ।
এক সূত্ৰই জানিবলৈ দিয়া অনুসৰি, এই অবৈধ বাহন সমূহ ৰাজপথত চলিবলৈ মৌখিক অনুমতি দিয়াৰ বাবদ প্ৰতিখন বাহনে প্ৰত্যেক মাহে জিলা পৰিবহন বিভাগক দিব লগা হয় দুইৰ পৰা তিনি হাজাৰ টকা ।
জনৈক ভাই উপাধিৰ এজন লোকে একাংশ বিষয়াক মেনেজ কৰাৰ নামত প্ৰতিখন বাহনৰ পৰা এই ধন সংগ্ৰহ কৰি অহাৰ অভিযোগ উত্থাপন হৈছে ।
এই ধন পৰিশোধ নকৰিলে ৰাজপথত এই বাহন সমূহ চলিবলৈ দিয়া নহব বুলিও হুংকাৰ প্ৰদান কৰাৰ অভিযোগ উত্থাপিত হৈছে ভাই উপাধিৰ লোকজনৰ বিৰুদ্ধে ।
