ডিজিটেল সংবাদ,গুৱাহাটী:বাৰিষাৰ লগে লগে আৰম্ভ হোৱা ডায়েৰীয়াৰ প্ৰাদুৰ্ভাৱ ৰোধ কৰাৰ উদ্দেশ্যে কামৰূপ মহানগৰ জিলাত বৃহস্পতিবাৰৰ পৰা আৰম্ভ হৈছে 'ডায়েৰীয়া নিয়ন্ত্ৰণ পষেক'৷ ভেটাপাৰা ৰাজ্যিক চিকিৎসালয়ত এই কাৰ্যসূচী মুকলি কৰে কামৰূপ মহানগৰ জিলাৰ স্বাস্থ্য বিভাগৰ দায়িত্বত থকা অতিৰিক্ত উপায়ুক্ত ডঃ ধ্ৰুৱজ্যোতি হাজৰিকাই।
১৫ জুলাইৰ পৰা ২৯ জুলাইলৈ চলিবলগীয়া এই পষেকত জিলাখনৰ ০-৫ বছৰ বয়সৰ সকলো শিশুকে সাঙুৰি লোৱা হ'ব আৰু শিশুসকলৰ মাজত অ আৰ এছ আৰু জিংক টেবলেট বিতৰণ কৰা হ'ব। লগতে ডায়েৰীয়াপ্ৰৱণ অঞ্চলসমূহ,বিশেষকৈ চহৰৰ বস্তি অঞ্চলসমূহ আৰু ভিতৰুৱা গাওঁসমূহত বিভিন্ন প্ৰচাৰ মাধ্যমেৰে সজাগতা সৃষ্টি কৰাৰ লগতে বিদ্যালয়ৰ ছাত্র-ছাত্রীসকলৰ মাজত শৌচাগাৰৰ ব্যৱহাৰ, পৰিষ্কাৰকৈ হাত ধোৱা অভ্যাস আৰু বিশুদ্ধ খোৱাপানী সেৱনৰ গুৰূত্ব সম্পৰ্কেও সজাগতা সৃষ্টি কৰা হ'ব৷
এই অনুষ্ঠানত জিলাখনৰ মুখ্য চিকিৎসা আৰু স্বাস্থ্য বিষয়া ডাঃ জে পি শৰ্মা, জিলা প্ৰতিষেধক বিষয়া ডাঃ বি কে দাসকে ধৰি স্বাস্থ্য বিভাগ আৰু ৰাষ্ট্ৰীয় স্বাস্থ্য অভিযানৰ বিষয়াসকল উপস্থিত থাকে।
