ডিজিটেল সংবাদ, বিহালীঃ বিশ্বকৰ্মা পূজাৰ দিনাই বিহালীত সংঘটিত হয় এক কৰুণ ঘটনা । বিহালী স্নাতক মহাবিদ্যালয়ৰ অধ্যক্ষ ডঃ জীৱন চন্দ্ৰ নাথৰ নিজা বাসগৃহৰ প্ৰথম মহলাৰ পৰা পৰি অকাল মৃত্যু ঘটে ।
পুৱা প্ৰাতঃভ্ৰমণ কৰি থকা সময়ত শেষবাৰৰ বাবে কথা হৈছিল চুবুৰীয়াৰ সৈতে । চুবুৰীয়াৰ মতে, প্ৰাতঃভ্ৰমণৰ পিছতে নিজা বাসগৃহলৈ আহি দাঁত ঘহা ব্ৰাছ লৈ প্ৰথম মহলাত কোনো কাম কৰি থকা সময়তে তললৈ পৰি মৃত্যুমুখত পৰে অধ্যক্ষগৰাকী ।
মৃতদেহৰ কাষত দাঁত ঘহা ব্ৰাছ, জোতা আৰু ভাঙি যোৱা নিমগছৰ ডাল প্ৰত্যক্ষ কৰে আৰক্ষী তথা দণ্ডাধীশে । ঘৰত কোনো নথকাৰ বাবে বহু পলমকৈ কাম কৰা কোনো লোকে নাথৰ মৃতদেহ প্ৰত্যক্ষ কৰি চুবুৰীয়াক খবৰ কৰে যদিও ইতিমধ্যে মৃত্যু হয় অধ্যক্ষগৰাকীৰ ।
ঘটনাস্থলীত, বিশ্বনাথ জিলাৰ আৰক্ষী অধীক্ষক শুভাশীষ বৰুৱা, উপ আৰক্ষী অধীক্ষক নৱজিৎ দাস বাঘ্ৰীকে ধৰি জিলা প্ৰশাসনৰ লোক সকল উপস্থিত আছিল । পিছত মৃতদেহ মৰণোত্তৰ পৰীক্ষা সম্পন্নৰ অন্তত বিহালী স্নাতক মহাবিদ্যালয়ত শেষ শ্ৰদ্ধা জনোৱা হ'ব । অধ্যক্ষ গৰাকীৰ অকাল মৃত্যুত বিভিন্ন দল, সংগঠন, ৰাইজ তথা ছাত্ৰ ছাত্ৰী সকলে গভীৰ শোক প্ৰকাশ কৰিছে ।
