অৰুণাচল আৰু মণিপুৰৰ প্ৰতিনিধিৰে আলোচনাৰ অন্ততহে দিল্লীত স্বাক্ষৰিত হ’ব নগা চুক্তি,আইবিৰ সঞ্চালকক দায়িত্ব..

ডিজিটেল সংবাদ,ৱাখা :  প্ৰায় দহ মাহ ধৰি স্থবিৰ হৈ থকা ভাৰত চৰকাৰ আৰু এন এছ চি মুইভা গোটৰ মাজৰ নগা শান্তি আলোচনাৰ গতিৰোধ দূৰ কৰিবলৈ সম্প্ৰতি প্ৰধানমন্ত্ৰী কাৰ্যালয়ে বিশেষ তৎপৰতা গ্ৰহণ কৰিছে। জানিব পৰামতে বিগত কিছু মাহৰ পৰা নগা শান্তি আলোচনাকলৈ চলি থকা কেতবোৰ বিতৰ্কক লৈ প্ৰধানমন্ত্ৰী নৰেন্দ্ৰ মোদীয়ে চিন্তিত হৈ পৰিছে। কিয়নো নগা শান্তি আলোচনাৰ কেন্দ্ৰৰ মধ্যস্থতাকাৰীৰ আৰ এন ৰবিৰ শেহতীয়া ভূমিকাৰ বাবে নগা গোটৰ সৈতে সম্পৰ্ক তিক্ততাপূৰ্ণ হৈ পৰিছে । অন্তিম পৰ্যায়ত উপনিত হোৱা এই নগা সমস্যাৰ সমাধানৰ বাবে সম্প্ৰতি প্ৰধানমন্ত্ৰী কাৰ্যালয়ে ভাৰতীয় চোৰাংচোৱা সংস্থাৰ বিশেষ সঞ্চালক অৰবিন্দ কুমাৰক দায়িত্ব অৰ্পণ কৰিছে। ইফালে ছয় দশকজোৰা নগা ৰাজনৈতিক সমস্যাটোৰ সমাধানৰ বাবে  কেন্দ্ৰীয় চৰকাৰে পুনৰ আলোচনা প্ৰক্ৰিয়া আৰম্ভ কৰিছে ।

অহা ছেপ্টেম্বৰ মাহত  হ'ব লগা চূড়ান্ত নগা চুক্তিৰ পৰিপ্ৰেক্ষিতত  এন এছ চি এন আই  এমে উত্থাপন কৰা বৃহত্তম নাগালিমৰ বাবে চুবুৰীয়া অৰুণাচল প্ৰদেশ আৰু মণিপুৰৰ নগা বসতি এলেকা একত্ৰিকৰণৰ বিষয়টো আলোচনা কৰা উদ্দেশ্য যোৱা শুক্ৰবাৰে নতুন দিল্লীত কেন্দ্ৰীয় চৰকাৰে মণিপুৰ আৰু অৰুণাচল প্ৰদেশৰ চৰকাৰৰ সৈতে এক ৰুদ্ধদাৰ  বৈঠকত মিলিত হয় । জানিব পৰামতে এন এছ চি এন আই এম আৰু নগা নেচনেল পলিটিকেল গোটৰ সৈতে হোৱা প্ৰতিখন  শেহতীয়া বৈঠকৰ অগ্ৰগতিৰ সন্দৰ্ভত প্ৰধানমন্ত্ৰী নৰেন্দ্ৰ মোডী আৰু গৃহমন্ত্ৰী অমিত শ্বাহক অৱগত কৰাইছে ।

আজি গৃহমন্ত্ৰ্যালয়ে প্ৰকাশ কৰামতে  ভাৰত চৰকাৰে অহা ছেপ্টেম্বৰ মাহৰ ভিতৰতে  ৭০ বছৰীয়া নগা ৰাজনৈতিক সমস্যাটোৰ সমাধানৰ বাবে বিভিন্ন নগা গোটৰ সৈতে চূড়ান্ত নগা চুক্তি স্বাক্ষৰ কৰিবলৈ ইচ্ছুক বুলি অৱগত কৰিছে । অৱশ্যে প্ৰয়োজন হলে চুক্তিৰ স্বাক্ষৰ এই সময় সীমা বৃদ্ধি কৰা হ'ব । সূত্ৰটোৱে জনোৱামতে ২০১৯  চনৰ ৩১ অক্টোবৰৰ দিনটো নগা চুক্তি স্বাক্ষৰ দিন ধাৰ্য  কৰা হৈছিল যদিও এন এছ চি এন এমৰ সৈতে সুকীয়া পতাকা আৰু সংবিধানৰ বিষয়টো  দুটা অদ্যপি অমীমাংসিত হোৱাৰ বাবে চুক্তিৰ অন্তিম ৰূপ দিব পৰা নাছিল। ফলত  শান্তি আলোচনা একপ্ৰকাৰ স্থবিৰ হৈ পৰিছিল ।

সম্প্ৰতি প্ৰধানমন্ত্ৰী কাৰ্যালয়ে এই শান্তি প্ৰক্ৰিয়া পুনৰ আৰম্ভ কৰিবলৈ নিৰ্দেশ দিয়ে । গৃহমন্ত্ৰ্যালয়ে আজি এটা কথা পুনৰ স্পষ্ট কৰিছে যে প্ৰতিবেশী ৰাজ্য মণিপুৰ আৰু অৰুণাচল প্ৰদেশৰ ভূমি নাগালিমত অন্তৰ্ভুক্তিৰ দাবী ইতিমধ্যে কেন্দ্ৰই নাকচ কৰিছে । কিন্তু ইয়াৰ পৰিৰ্ৱতে সংবিধানৰ ষষ্ঠ অনুসূচিৰ অধীনত অৰুণাচল প্ৰদেশ আৰু মণিপুৰত নগাসকলৰ বাবে দুখন স্বায়ত্ত পৰিষদৰ প্ৰস্তাৱ কৰিছে । কেন্দ্ৰীয় চৰকাৰে ইতিমধ্যে এই সন্দৰ্ভত অৰুণাচল প্ৰদেশ আৰু মণিপুৰ চৰকাৰৰ সৈতে প্ৰশাসনিক নিয়ম আৰু পৰিসীমাৰ বিষয়ে সংশ্লিষ্ট ৰাজ্যৰ সৈতে আলোচনাত মিলিত হৈছে । সুত্ৰটোৱে জনোৱা মতে নগা চুক্তিৰ সন্দৰ্ভত প্ৰায় ৫০  লানি বৈঠক হৈ গৈছে গতিকে এন এছ চি এনৰ সৈতে  আলোচনা কৰিবলৈ একো বাকী নাই । এতিয়া বিদ্ৰোহীসকলৰ অস্ত্ৰ সম্বৰণ আৰু পুনৰ সংস্থাপনৰ বিষয়টো অন্তিম ৰূপ দিবলৈ  বাকী আছে।

জানিব পৰামতে চূড়ান্ত নগা চুক্তিৰ সন্দৰ্ভত ছয় নগা পলিটিকেল গ্ৰুপ আৰু ৱৰ্কিং কমিটিৰ সৈতে সকলো বিষয়ত ইতিমধ্যে সহমতত কেন্দ্ৰীয় চৰকাৰ উপনীত হৈছে গতিকে এন এন জি পিৰ সৈতে ভাৰত চৰকাৰৰ চুক্তি স্বাক্ষৰ যিকোনো সময়ত হব পাৰে ।কেৱল এন এছ চি এন আই এমৰ সৈতে সুকীয়া পতাকা আৰু সংবিধানৰ বিষয় দুটা নিস্পত্তি হলেই  হব। ইতিমধ্যে নগা শান্তি আলোচনাৰ সবিশেষ প্ৰধানমন্ত্ৰী নৰেন্দ্ৰ মোডীক অৱগত কৰোৱা বুলি জানিবলৈ দিছে । প্ৰধানমন্ত্ৰী নৰেন্দ্ৰ মোদীয়ে অহা ছেপ্টেম্বৰ মাহৰ ভিতৰত নগা চুক্তি স্বাক্ষৰ বাবে নিৰ্দেশ দিছে । অৱশ্যে মোডীয়ে কেৱল এন এছ চি এন মুইভা গোটৰ সৈতে নহয় সকলো সশস্ত্ৰ নগা ৰাজনৈতিক গোটক সামৰি একে লগ এই নগা চুক্তি স্বাক্ষৰ কৰিবলৈ বিচাৰিছে ।