ডিজিটেল সংবাদ, গৰৈমাৰীঃ কামৰূপ জিলাৰ ছয়গাঁও বিধানসভা সমষ্টিৰ অন্তৰ্গত সংখ্যালঘু অধ্যূষিত গৰৈমাৰীৰ ব্ৰহ্মপুত্ৰ ভেলী একাডেমীৰ পঞ্চমসংখ্যক বাৰ্ষিক যুৱ মহোৎসৱ উপলক্ষে ছাত্ৰ-ছাত্ৰীসকলে আজি দিনৰ প্ৰায় ১১ বজাত উলিওৱা বৰ্ণিল সাংস্কৃতিক শোভাযাত্ৰাই সকলোকে অভিভূত কৰে৷
বৰ্ণিল সাংস্কৃতিক শোভাযাত্ৰা উদ্বোধন কৰে মাজৰটোপ উচ্চতৰ মাধ্যমিক বিদ্যালয়ৰ অধ্যক্ষ আক্কাছ আলী আহমেদ৷ যুৱ মহোৎসৱ উপলক্ষে আজি বিহু নৃত্য, নাওঁখেল, মাছমৰীয়া, জিকিৰ জাৰী, শংকৰদেৱ, চিকিৎসক, আদিবাসী, ঝুমুৰ নৃত্য, কনকলতা, দৰা-কইনা, লাঠিবাৰী, তিৱা জনগোষ্ঠী আদি বিভিন্ন ধৰণৰ সাজ-পোছাক পৰিধান কৰি সহস্ৰাধিক ছাত্ৰ-ছাত্ৰীয়ে কাণহাৰাৰ বিদ্যালয় প্ৰাংগণৰ পৰা গৰৈমাৰী দৈনিক বজাৰ, ৰাজীৱ ভৱন, বাছ আস্থান হৈ গৰৈমাৰী টাউন ক্লাব খেলপথাৰলৈ উলিওৱা বৰ্ণিল সাংস্কৃতিক শোভাযাত্ৰাই ৰাইজক মুহিবলৈ সক্ষম হয়৷
উল্লেখ্য যে বাৰেৰহনীয়া সাংস্কৃতিক শোভাযাত্ৰাৰ পূৰ্বে যুৱ মহোৎসৱ উপলক্ষে পতাকা উত্তোলন, গছপুলি ৰোপন কৰি কাৰ্যসূচীৰ শুভাৰম্ভ কৰা হয়৷ ইপিনে বৰ্ণিল সাংস্কৃতিক শোভাযাত্ৰা উপলক্ষে আয়োজিত সম্বৰ্ধনা অনুষ্ঠানটি পৰিচালনা কৰে একাডেমীৰ তত্ত্বাৱধায়ক আবুল কালাম আজাদ৷
