ডবকাৰ চুৰি মটৰ চাইকেল দিলাইত উদ্ধাৰ, এজনক আটক

ডিজিটেল সংবাদ, বোকাজানঃ ডবকাৰ পৰা চুৰ কৰি অনা এখন নম্বৰ প্লেট বিহীন পালচাৰ মটৰ চাইকেল সোমবাৰে কাৰ্বি আংলঙৰ দিলাই আৰক্ষীয়ে উদ্ধাৰ কৰিবলৈ সক্ষম হোৱাৰ লগতে চোৰটোকো আটক কৰিবলৈ সক্ষম হয়৷ আটকাধীন চোৰটো ডবকাৰ ৱাৰ্ড নং ২ ৰ মহম্মদ ছইফুদ্দিন বুলি আৰক্ষীয়ে জানিবলৈ দিছে৷ আৰক্ষীৰ সূত্ৰ অনুসৰি দিলাই আৰক্ষীৰ নিয়মীয়া তালাচীত ডিমাপুৰ দিশেৰে আহি থকা মটৰ চাইকেলখনক আৰক্ষীয়ে ৰখাবলৈ সংকেত দিয়াৰ স্বত্বেও তীব্ৰ বেগেৰে পলায়ন কৰে।

লগে লগে আৰক্ষীয়ে চোৰটোক অনুসৰণ কৰি দহ মাইল অঞ্চলত আটক কৰিবলৈ সক্ষম হয়৷ আৰক্ষীৰ জেৰাত চোৰটোৱে মটৰ চাইকেলখন ডবকাৰ পৰা চোৰ কৰি অনা বুলি স্বীকাৰ কৰাত দিলাই আৰক্ষীয়ে ডবকা আৰক্ষীৰ লগত যোগাযোগ কৰাত মটৰ চাইকেলখন চুৰি হোৱাৰ অভিযোগ ডবকা থানাত ৰজু হোৱা বুলি জানিব পৰা গৈছে৷