NEIFT ৰ সহযোগত অনাথ শিশুৰ উপস্থিতিৰে মহানগৰীৰ XS বাৰত খ্ৰীষ্টমাছ ইভ উদযাপন…

ডিজিটেল ডেস্কঃ খ্ৰীষ্টমাছ ইভৰ উপলক্ষে মহানগৰীৰ খ্ৰীষ্টানবষ্টিৰ অনিল প্লাজাস্থিত এক্সএছ বাৰত বৃহস্পতিবাৰে অনুষ্ঠিত হয় এক আকৰ্ষনীয় অনুষ্ঠান। এই অনুষ্ঠানত উপস্থিত থাকে শিল্পী জুবিন গাৰ্গ, গুৱাহাটী চিটি কমিছনাৰ মুন্না প্ৰসাদ গুপ্তা, নৃত্যশিল্পী মৰমী মেধি, অভিনেত্ৰী নিশিতা গোস্বামী আৰু মেঘৰঞ্জনী মেধি।

দিনৰ ১ বজাত উদযাপিত অনুষ্ঠানটোত উপস্থিত হৈ গুৱাহাটী চিটি কমিছনাৰ মুন্না প্ৰসাদ গুপ্তাই অনাথ শিশু সকলৰ লগত মত বিনিময় অনুষ্ঠানত ভাগ লৈ শিশু সকলৰ শৈশৱ সুৰক্ষিত ৰক্ষাৰ বাবে গুৰুত্ব দিয়া উচিত বুলিও তেওঁ মন্তব্য কৰে।

এই অনুষ্ঠানত উপস্থিত থাকে বৰীন হুড আৰ্মিৰ দ্বাৰা লালিত ২৫ জন মান অনাথ শিশুৱে। ৰবীন হুড আৰ্মিৰ স্বেচ্ছাসেৱক বিশাল কুৃমাৰ ৰয়ে ২০১৪ চনত দিল্লীত প্ৰতিষ্ঠা হোৱা ৰবীন হুড আৰ্মিৰ উদ্দেশ্য আৰু কাম কাজৰ বিষয়ে উল্লেখ কৰে।

গুৱাহাটীৰ ৰবীন হুড আৰ্মিয়ে শাখাটোৱে অনাথ শিশু সকলৰ বাবে হোটেল ৰেষ্টুৰেণ্টৰ ৰাহি হোৱা খাদ্য সংগ্ৰহ কৰাৰ কথা উল্লেখ কৰে।ইয়াৰ উপৰিও এই সকল অনাথ শিশুসকলক প্ৰয়োজন অনুসৰি প্ৰাথমিক শিক্ষা প্ৰদান কৰে বুলিও জানিবলৈ দিয়ে তেওঁ।

অনুষ্ঠানৰ মূল আকৰ্ষণ এই অনাথ শিশু সকলৰ মূখত হাঁহি বিৰিঙাবলৈ আয়োজিত অনুষ্ঠানটিত শিশু সকলৰ মাজত চকীখেলকে ধৰি বহু কেইটা খেল অনুষ্ঠিত হয়।এনআইইএফটিৰ সহযোগত আয়োজিত অনুষ্ঠানটোত চান্টাক্লজে শিশু সকলৰ মাজত চকলেটৰ লগতে বিতৰণ কৰে আকৰ্ষণীয় উপহাৰ।

আনহাতে তেওঁলোকে শিশু সকলক উৎসাহিত কৰিবৰ বাবে চকী খেলৰ বিজয়ী সকলক পুৰষ্কৃতও কৰে। অভিনেত্ৰী নিশিতা গোস্বামী আৰু মেঘৰঞ্জনী মেধিয়েও খ্ৰীষ্টমাছৰ বিশেষ দিনটোত অনাথ শিশুৰ মুখত হাঁহি বিৰঙাবলৈ XS য়ে গ্ৰহণ কৰা পদক্ষেপৰ সলাগ লয়।

শিশু সকলে সকলোৰে বাবে হাঁহিৰ উৎস কঢ়িয়াই আনে বুলিও উল্লেখ কৰে মেঘৰঞ্জনী মেধিয়ে।অসমীয়া প্ৰতিদিনৰ ডিজিটেল ডেস্কৰ প্ৰশ্নৰ উত্তৰত জুবিন গাৰ্গে কাৰ সন্দৰ্ভত নিজৰ স্থিতি ব্যক্ত কৰে।

কা'ৰ আন্দোলন নৰ্থ ইষ্ট ফেষ্টতো কৰিছে বুলি উল্লেখ কৰি তেওঁ এইবাৰ কোৰোনাৰ বাবে কাৰ আন্দোলন ভাৰ্চুৱেলি কৰিব বুলিও মন্তব্য কৰে।"কা'ৰ মোৰ মনত এতিয়াও আছে সদায় থাকিব। বহু শিল্পী ইয়াৰ পৰা আঁতৰি গ'ল কিন্তু মই আৰু মোৰ অনুৰাগী সকল সদায় কাৰ বিপক্ষে থিয় দি আছো আৰু থাকিম।" বুলিও মন্তব্য কৰে শিল্পীজনে।

এই খ্ৰীষ্টমাছ অনুষ্ঠানৰ আয়োজক তথা এক্স এছ বাৰৰ স্বতাধিকাৰ বিক্ৰম ৰায় মেধিয়ে কয় যে, খ্ৰীষ্টমাছৰ উদ্দেশ্যই হৈছে মানুহৰ মুখত হাঁহি বিৰিঙোৱা, সেয়ে তেওঁলোকে এই অনুষ্ঠানৰ যোগেৰে অনাথ শিশু সকলক আনন্দ উপহাৰ দিয়াৰ প্ৰয়াস কৰিছে ।

স্বত্বাধিকাৰ গৰাকীয়ে ইয়াৰ লগতে পৰৱৰ্তী সময়ত প্ৰত্যেক বৰ্ষতে তেওঁলোকে এনে অনুষ্ঠান আয়োজন কৰিব বুলিও উল্লেখ কৰে।উপস্থিত সকলোৱে এই অনুষ্ঠানে খ্ৰীষ্টমাছৰ বিশেষ দিনটোত ধনাত্মক বাৰ্তা কঢ়িয়াই আনিছে বুলি মন্তব্য কৰে।