ডিজিটেল সংবাদ, হাওৰাঘাটঃ কাৰ্বি আংলং জিলাৰ হাওৰাঘাট বিধানসভা সমষ্টিৰ অন্তৰ্গত কাংকী - বেলগুৰি বৃহত্তৰ বহুমুখী সমবায় সমিতিৰ ২০২৪ - ২০২৫ বৰ্ষৰ এখন বছৰেকীয়া সাধাৰণ সভা আজি পুৱা দহ বজাত সমবায় সমিতিৰ কাৰ্যালয় চৌহদত অনুষ্ঠিত হৈ যায় । কাংকী - বেলগুৰি বৃহত্তৰ বহুমুখী সমবায় সমিতিৰ সাধাৰণ সভাত সভাপতিত্ব কৰে সমবায় সমিতিৰ চেয়াৰমেন ছামছিং টেৰণে । সভাৰ উদ্দেশ্য ব্যাখ্যা কৰে সম্পাদক কমলা মেধিয়ে ।
সভাত মুখ্য অতিথি তথা পৰ্যবেক্ষক হিচাপে উপস্থিত থাকে লাইনেল টেৰণে । সভাত সমবায় সমিতিখনৰ সদস্য ক্ৰমে টিকেন বৰা, ৰামায়ণ চৌহান, ধনেন ব্ৰহ্মৰ লগতে হুকুৰাম কাথাৰ উপস্থিত থাকি সমজুৱাৰ ফালৰপৰা দুআষাৰ বক্তব্য ৰাখে । কাংকী ইংতি গাঁও, বেলগুৰি, দক্ষিণ দীঘলীপাৰ, গৰখীয়া পুখুৰী, চামগুৰি, দুৰ্গাপুৰ, পলকামাটি আদি বিভিন্ন গাঁৱৰ পৰা অহা কেইবা শতাধিক অংশীদাৰ ৰাইজে সভাত অংশগ্ৰহণ কৰে ।
এই সভাতেই সমবায় সমিতিৰ সম্পাদক কমলা মেধিয়ে সমিতিৰ হিচাব নিকাচ দাখিল কৰাৰ লগতে সমবায় সমিতিৰ উন্নয়নৰ বাবে ২০২৫ -২০২৬ বৰ্ষৰ এখন সম্ভাব্য বাজেট সভাত দাঙি ধৰে । আনহাতে এই সভাতে পৰবৰ্তী সময়ৰ বাবে হিচাব পৰীক্ষক হিচাপে বীৰেন ইংতি আৰু পবিত্ৰ পাটৰক নিৰ্বাচিত কৰা হয় ।
