ডিজিটেল সংবাদ পাটাছাৰকুছিঃ সৰুৰে পৰাই মেধাৰ পৰিচয় দাঙি ধৰা ধৰমতলা নিবাসী নীলাক্ষি দাসে শৈক্ষিক সুক্ষাতিৰ অৰ্জনেৰে পাটাছাৰকুছিৰ লগতে শিক্ষাৰ পিঠস্থান বুলি কোৱা বজালী জিলাকে গৌৰৱান্বিত কৰিলে৷ সুদীৰ্ঘ পাঁচ বছৰ ধৰি National Institute of Technology(NIT), Silchar ৰ পদাৰ্থ বিজ্ঞান বিভাগত গৱেষণা কৰি নীলাক্ষি দাসে “ Signature of New Physics In The Semi Leptonic Decays of B Hadrons in The Light of Recent B Anomalies" বিষয়ৰ গৱেষনাৰ বাবে NIT Silchar ৰ পৰা ডক্টৰেট ডিগ্ৰী লাভ কৰিবলৈ সক্ষম হৈছে৷
এনে খবৰে অঞ্চলতোৰ লোকসকলক আনন্দিত কৰি তুলিছে৷ স্থানীয় বিধায়ক তথা কেবিনেট মন্ত্ৰী ৰণজিৎ কুমাৰ দাসে ইতিমধ্যে পিতৃ-মাতৃক শুভেচ্ছা জ্ঞাপন কৰিছে৷ অঞ্চলতোৰ বিভিন্ন জনে এনে সফলতা সন্তোষ প্ৰকাশ কৰিছে আৰু অভিনন্দন জনাইছে শিক্ষাৰ্থীগৰাকীক৷
তেওঁ NIT Silchar ৰ পদাৰ্থ বিজ্ঞান বিভাগৰ প্ৰফেচৰ ড° ৰূপক দত্তৰ তত্বাবধানত গৱেষণা কৰিছিল৷ নিলাক্ষীয়ে পাটাছাৰকুছি শংকৰদেৱ শিশু নিকেতনৰ পৰা ২০১০ চনত ৭৯ শতাংশ নম্বৰেৰে মেট্ৰিক উত্তীৰ্ণ হৈছিল আৰু ৭৫ শতাংশ নম্বৰেৰে পূৰ্বৰ বজালী কলেজৰ পৰা উচ্চতৰ মাধ্যমিক পৰীক্ষাত উৰ্ত্তীণ হৈছিল৷
একেখন কলেজৰ পৰাই স্নাতক পৰীক্ষাত পদাৰ্থ বিজ্ঞান মেজৰ হিচাপে ৮২ শতাংশ নম্বৰৰ পাই উত্তীৰ্ণ হৈছিল৷ আনহাতে গুৱাহাটী বিশ্ববিদ্যালয়ৰ পৰাও পদাৰ্থ বিজ্ঞান বিষয়ত ৭৩ শতাংশ নম্বৰেৰে উত্তীৰ্ণ হৈ পিছত গেইট(GATE) পৰীক্ষা দি শিলচৰৰ উক্ত শিক্ষানুস্থানত গৱেষণা কৰাৰ সুযোগ লাভ কৰিছিল৷
ইতিমধ্যে উচ্চ পৰ্যায়ৰ গৱেষণাৰ বাবে আগশাৰীৰ শিক্ষানুষ্ঠানলৈ যোৱাৰ চিন্তা কৰিছে তেওঁ৷ নিলাক্ষী দাস বজালী জিলাৰ পাটাছাৰকুছি (ধৰমতলা) নিবাসী তথা পাটাছাৰকুছি হাইস্কুলৰ শিক্ষক শ্ৰীসদাৰাম দাস আৰু সোনালী দাসৰ জীয়ৰী৷
