কেইবাখনো জিলাৰ আৰক্ষী অধীক্ষকক বদলি…

ডিজিটেল ডেস্কঃ ৰাজ্যৰ গৃহ বিভাগৰ এক নিৰ্দেশনাৰ জৰিয়তে অসম আৰক্ষীত ব্যপক ৰদ-বদল কৰা হৈছে। কেইবাখনো জিলাৰ আৰক্ষী অধীক্ষকক এখন জিলাৰ পৰা আন এখন জিলালৈ বদলি কৰাৰ লগতে কেইবাজনো আৰক্ষী বিষয়াক দিয়া হৈছে নতুন দায়িত্ব।

সেই অনুসৰি বিতৰ্কৰ মাজত সোমাই পৰি নগাঁৱৰ পৰা আৰক্ষী মুখ্য কৰ্যালয়লৈ বদলি হ'বলগীয়া হোৱা নগাঁৱৰ পূৰ্বৰ নগাঁৱৰ আৰক্ষী অধীক্ষক আনন্দ মিশ্ৰৰ স্থানত স্থলাভিষিক্ত কৰা হৈছে বিশ্বনাথৰ আৰক্ষী অধীক্ষক লীনা দলেক। আনহাতে শদিয়াৰ আৰক্ষী অধীক্ষক মোহন লাল মীনাক যোৰহাট জিলাৰ আৰক্ষী অধীক্ষক হিচাপে নিযুক্তি প্ৰদান কৰা হৈছে।

একেদৰে শিৱসাগৰ জিলাৰ আৰক্ষী অধীক্ষক হিচাপে নিযুক্তি দিয়া হৈছে শুভ্ৰজ্যোতি বৰাক। ১নং এ পি বি এনৰ কামাণ্ডেণ্ট যুৱৰাজক চৰাইদেউৰ আৰক্ষী অধীক্ষক হিচাপে নিযুক্তি দিয়া হৈছে। নলবাৰীৰ অতিৰিক্ত আৰক্ষী অধীক্ষক পুষ্কিন জৈনক শদিয়ালৈ আৰক্ষী অধীক্ষক হিচাপে বদলি কৰা হৈছে। চৰাইদেউৰ আৰক্ষী অধীক্ষক সুধাকৰ সিঙক গুৱাহাটী (পূৱ) আৰক্ষী উপায়ুক্ত পদলৈ বদলি কৰা হৈছে।

সেইদৰে দৰং জিলাৰ আৰক্ষী অধীক্ষক সুশান্ত বিশ্ব শৰ্মাক শোণিতপুৰলৈ বদলি কৰা হৈছে। আনহাতে ১ নং এ পি টি এফ বেটেলিয়নৰ কামাণ্ডেণ্ট ৰাজ মোহন ৰয়ক দৰং জিলাৰ আৰক্ষী অধীক্ষক হিচাপে বদলি কৰা হৈছে। কাহিলীপাৰাস্থিত চতুৰ্থ বেটেলিয়নৰ কামাণ্ডেণ্ট শিলাদিত্য চেতিয়াক কাহিলীপাৰাৰ অসম আৰক্ষীৰ বিশেষ শাখাৰ মুখ্য কাৰ্যালয়ৰ আৰক্ষী অধীক্ষক পদলৈ বদলি কৰা হৈছে।

শোণিতপুৰৰ আৰক্ষী অধীক্ষক ডাঃ ধনঞ্জয় পৰশুৰাম ঘণাৱটক অসম আৰক্ষীৰ মুখ্য কাৰ্যালয়ৰ সহকাৰী মহাপৰিদৰ্শক (প্ৰশাসন) পদলৈ বদলি কৰা হৈছে। মুখ্যমন্ত্ৰীৰ নিৰাপত্তাৰ দায়িত্বত থকা আৰক্ষী অধীক্ষক নবীন সিঙক বিশ্বনাথৰ আৰক্ষী অধীক্ষক পদলৈ বদলি কৰা হৈছে। ইফালে তৃতীয় এ পি বি এনৰ কামাণ্ডেণ্ট ইমদাদ আলীক পশ্চিম কাৰ্বি আংলঙৰ আৰক্ষী অধীক্ষক হিচাপে নিযুক্তি দিয়া হৈছে।