টাৰ্গেট অসম বিধানসভাৰ উপাধ্যক্ষ! কোনোমতেহে ৰক্ষা পৰিল আমিনুল হক লস্কৰ…

ডিজিটেল সংবাদ, শিলচৰঃ দ্বিতীয়বাৰৰ বাবে পথ দুৰ্ঘটনাৰ পৰা ৰক্ষা পৰিল অসম বিধান সভাৰ উপাধ্যক্ষ আমিনুল হক লস্কৰ৷ গুৱাহাটীৰ পৰা উভতি আহোতে বুধবাৰে আবেলি মেঘালয়ৰ নংপুত সংঘটিত এক পথ দুৰ্ঘটনাত আমিনুল হক লস্কৰৰ এছক'ৰ্ট বাহনখন পথৰ পৰা এটি নলাত পৰি যায়৷ কোনো দুস্কৃতিকাৰীয়ে যান বাহন ডকাইতি কৰা আৰু ৰিকোভাৰী ক্ৰেনৰ ব্যৱসায় কৰাৰ উদ্দেশ্যে শ্বিলং-গুৱাহাটীৰ ৰাষ্ট্ৰীয় পথৰ নংপুত পথৰ ওপৰত ডিজেল পেলাই থৈছিল৷ এই ডিজেলৰ ওপৰেৰে আহোতেই এচক'ৰ্ট বাহনখন দুৰ্ঘটনাৰ কৱলত পৰে৷ ইফালে, এছক'ৰ্ট বাহনৰ আগত গৈ থকা উপাধ্যক্ষৰ বাহন আৰু পাইলট বাহন দুখন কোনোমতে দুৰ্ঘটনাৰ পৰা ৰক্ষা পৰে৷

দুৰ্ঘটনাগ্ৰস্ত বাহনত থকা উপাধ্যক্ষৰ দুজন দেহৰক্ষী আহত হয়৷ ঘটনাক কেন্দ্ৰ কৰি আচৰিত হৈ উপাধ্যক্ষসহ পাইলট বাহনৰ দেহৰক্ষীসকল বাহনৰ পৰা নামি আহি আহত দেহৰক্ষী দুজন আৰু চালকক উদ্ধাৰ কৰে৷ আহত দেহৰক্ষী মনোজ কুমাৰ নাথ আৰু এবাদুৰ ৰহমানক লগে লগে উন্নত চিকিৎসাৰ বাবে গুৱাহাটীলৈ প্ৰেৰণ কৰা হয়৷ অৱশ্যে, বাহনখনৰ চালকজন আঘাতপ্ৰাপ্ত হোৱা নাই৷ ইফালে, উপাধ্যক্ষ আমিনুল হক লস্কৰে অসমীয়া প্ৰতিদিনৰ ডিজিটেল সংস্কৰণক জানিবলৈ দিয়া অনুসৰি তেওঁ গুৱাহাটীত অনুষ্ঠিত কৃষি বিভাগৰ এক অনুষ্ঠান শেষ কৰি মেঘালয়ৰ মাজেৰে শিলচৰলৈ আহি আছিল৷

নংপুৰ পৰা ৫-৬ কিলোমিটাৰ পাৰ হোৱাৰ পিছতে এছক'ৰ্ট বাহনখন দুৰ্ঘটনাৰ কৱলত পৰে৷ ৰাষ্ট্ৰীয় পথটোৰ জন শূণ্য এলেকাত দুস্কৃতিকাৰীয়ে ডিজেল পেলাই পথটোৰে যাতায়ত কৰা বাহনসমূহ দুৰ্ঘটনাগ্ৰস্ত কৰি পথৰ দাতিত পেলাই দিয়া বুলি সন্দেহ আমিনুল হকৰ৷ দুৰ্ঘটনাগ্ৰস্ত বাহনসমূহ অধিক ধনৰ বিনিময়ত ৰিকোভাৰী ক্ৰেনৰ জৰিয়তে উদ্ধাৰ কৰি এই দুস্কৃতিকাৰীসকলে যাত্ৰী সকলক হাৰাশাস্তি কৰাৰো অভিযোগ আমিনুল হক লস্কৰৰ৷

অৱশ্যে, তেওঁ ভাগ্যৰ বলত কোনোমতে দুৰ্ঘটনাটোৰ পৰা ৰক্ষা পোৱাত নেদেখাজনক ধন্যবাদ জনায়৷ ইফালে, পথত ডিজেল পেলাই অসম, মিজোৰাম, মণিপুৰ আৰু মেঘালয়ৰ যাত্ৰী সকলক দুৰ্ঘটনাৰ মাজলৈ ঠেলি দি বুজণ পৰিমাণৰ ধন আদায় কৰা বিষয়টো মেঘালয়ৰ মুখ্যমন্ত্ৰীক অৱগত কৰাব বুলিও সদৰী কৰে আমিনুল হক লস্কৰে৷ উল্লেখ্য যে, যোৱা বছৰ উত্তৰ প্ৰদেশতো এক পথ দুৰ্ঘটনাৰ কৱলত পৰি কোনো মতে ৰক্ষা পৰিছিল আমিনুল হক লস্কৰ৷