ডিজিটেল ডেস্কঃ ২০১৯ চনলৈ ফেচবুকৰ মুখ্য কাৰ্যবাহী মাৰ্ক জুকাৰবাৰ্গে নিজৰ পদৰ পৰা পদত্যাগ কৰিবলগীয়া হ'ব পাৰে। কোম্পানীৰ একাংশ শ্বেয়াৰ হোল্ডাৰে জুকাৰবাৰ্গক আঁতৰোৱাৰ বাবে উত্থাপন কৰা প্ৰস্তাৱত সন্মতি জনাইছে৷ তেওঁলোকৰ ভাষ্য অনুসৰি, জুকাৰবাৰ্গে ফেচবুকৰ কিছুমান কঠিন পৰিস্থিতিত লোৱা সিদ্ধান্ত শুদ্ধ নোহোৱাৰ বাবেই তেওঁক আঁতৰোৱাৰ বাবে গ্ৰহণ কৰা প্ৰস্তাৱত সমৰ্থন জনোৱা হৈছে৷
প্ৰস্তাৱত কোৱা হৈছে আমেৰিকা নিৰ্বাচনত ৰুছৰ হস্তক্ষেপ আৰু কেম্ব্ৰিজ এনালিতিকা ডাটা লীকৰ ক্ষেত্ৰত ফেচবুকে জুকাৰবাৰ্গৰ তত্বাবধানত সঠিকভাৱে কাম কৰিবলৈ অক্ষম হয়৷ যাৰ পৰিপ্ৰেক্ষিত ফেচবুকক স্বতন্ত্ৰ কৰাৰ স্বাৰ্থত জুকাৰবাৰ্গক আঁতৰোৱাটো প্ৰয়োজনীয় হৈ পৰিছে৷
ইফালে জুকাৰবাৰ্গৰ বিৰুদ্ধে গ্ৰহণ কৰা এই প্ৰস্তাৱৰ নিৰ্ণয় ২০১৯ চনৰ মে' মাহত অনুষ্ঠিত হ'বলগীয়া ফেচবুকৰ বাৰ্ষিক আলোচনাৰ সময়ত ভোট গ্ৰহণৰ জৰিয়তে কৰা হ'ব৷ জুকাৰবাৰ্গক পদৰ পৰা আঁতৰোৱা হ'ব নে নহয় সেয়া সিদ্ধান্ত লোৱা হ'ব ভোট গ্ৰহণৰ পিছতহে৷
আনহাতে, জুকাৰবাৰ্গক লৈ চলি থকা বিবাদ সম্পৰ্কে ফেচবুকে কোনো ধৰণৰ প্ৰতিক্ৰিয়া ব্যক্ত কৰা নাই৷ এক ৰাষ্ট্ৰীয় সংবাদ মাধ্যমৰ বাতৰি মতে, ফেচবুকক লৈ চলা এই বিতৰ্কত জুকাৰবাৰ্গৰ বিৰুদ্ধে গ্ৰহণ কৰা প্ৰস্তাৱত নিউয়ৰ্ক কন্ট্ৰ'ল স্ক'ট ষ্ট্ৰিংগাৰসহ ইলিনায়, ৰ'ড আইলেণ্ড আৰু পেন্সিব্লেনিয়াৰ ৰাজ্যিক কাৰ্যনিৰ্বাহকেও সমৰ্থন জনাইছে৷
ষ্ট্ৰিংগাৰে এই সন্দৰ্ভত কয় যে ফেচবুকে আমাৰ সমাজ আৰু অৰ্থব্যৱস্থাত এক গুৰুত্বপূৰ্ণ ভূমিকা পালন কৰি আহিছে৷ যাৰ বাবে ফেচবুক আৰ্থিক আৰু সামাজিক দায়বদ্ধতাৰ ক্ষেত্ৰতো পাৰদৰ্শী হোৱা প্ৰয়োজন৷ আমি এয়াই বিচাৰো যে তাৰ বাবে কোম্পানীৰ সঞ্চালন পৰিষদ স্বাধীন আৰু দায়বদ্ধশীল হওক৷
উল্লেখ্য যে, জুকাৰবাৰ্গৰ ওচৰত প্ৰায় ৬০ শতাংশ ভোট অধিকাৰ আছে৷ তেওঁক পদৰ পৰা আঁতৰোৱাৰ বাবে প্ৰস্তাৱ প্ৰদান কৰা কোম্পানীসমূহৰ ওচৰত ৪৫ লাখ শ্বেয়াৰ আছে৷ আনহাতে পেনিশ্লিভিয়া কোষাগাৰৰ ওচৰত ৩৮৭৩৭ শ্বেয়াৰ আছে৷