ডিজিটেল সংবাদ, ইটানগৰঃ শুকুৰবাৰে নিচেই পুৱাতে অৰুণাচল প্ৰদেশ বিজেপিৰ সভাপতি টাপিৰ গাওৰ ইটানগৰত থকা ব্যক্তিগত বাসভৱনত সংঘটিত হোৱা এক ৰহস্যজনক ঘটনাই সমগ্ৰ অৰুণাচলতে তীব্ৰ চাঞ্চল্যৰ সৃষ্টি কৰিছে৷ পুৱা প্ৰায় ৬.১২ বজাত দুখন মাৰুতি গাড়ী গাওৰ বাসভৱনৰ সন্মুখত পথৰ ওপৰত ৰয়হি৷ কেই মুহূৰ্তমানৰ পাছত বগা ৰঙৰ মাৰুতি ৱাগনাৰ গাড়ীখন গাওৰ বাসভৱনৰ প্ৰবেশদ্বাৰৰ নিচেই কাষলৈ লৈ আহে৷ পাছত কান্ধত দীঘল দা লৈ থকা গাড়ীৰ চালকজন নামি যায় আৰু এটা আধামৰা কুকুৰ আনি গাওৰ বাসভৱনৰ গেটৰ কাষলৈ দলিয়াই দিয়ে আৰু পুনৰ দাৰে ঘপিয়াই হত্যা কৰে৷
তাৰ কেই চেকেণ্ডমান পাছতে একেজন ব্যক্তিয়ে চালকৰ আসনৰ কাষৰ দুৱাৰখন খুলি গাড়ীৰ ভিতৰত থকা পেট্ৰ'লৰ গেলন এটাত অগ্নি সংযোগ কৰাত গাড়ীখন দাউ দাউকৈ জ্বলি যায় ৷ এই ভয়ানক কাৰ্য সংঘটিত কৰিবলৈ যাওঁতে ব্যক্তিজন কোনোমতে জুই নলগাকৈ ৰক্ষা পৰে৷
উল্লেখ্য যে, সেই সময়ত টাপিৰ গাওৰ নীতিবিহাৰত থকা বাসভৱনৰ মূল দুৱাৰখন বন্ধ আছিল৷ টাপিৰ গাও প্ৰধানমন্ত্ৰীৰ শপতগ্ৰহণ অনুষ্ঠানৰ বাবে দিল্লীত আছিল৷
স্থানীয় টানি জনগোষ্ঠীয় বিশ্বাস অনুসৰি কোনো ব্যক্তিৰ বাসভৱনলৈ এনেদৰে মৃত কুকুৰ বা কুকুৰৰ কটা মুৰ দলিয়াই দিয়াৰ প্ৰথা আছে আৰু ইয়াৰ জড়িয়তে প্ৰতিশোধ লোৱাৰ সাবধানবাণী প্ৰেৰণ কৰা হয়৷ স্থানীয় জন-বিশ্বাসৰ পৰা এই কাৰ্যৰ জড়িয়তে কোনো অজ্ঞাত লোকে টাপিৰ গাওক কুকুৰটোক হত্যা কৰা বা গাড়ী জ্বলাই হত্যা কৰাৰ ভাবুকি দিয়া বুলি বাৰ্তা প্ৰেৰণ কৰিছে বুলি নিশ্চিত কৰা হৈছে৷
উল্লেখ্য যে বিগত লোকসভা নিৰ্বাচনত টাপিৰ গাও পূব অৰুণাচল বিধানসভা সমষ্টিৰ পৰা বিজেপিৰ টিকটত লোকসভালৈ নিৰ্বাচিত হৈছিল৷ তদুপৰি অৰুণাচল প্ৰদেশত কোনো সাংগাঠনিক ভেটি নথকা জনতা (ইউ)ৰ পৰা বহু কেইজন বিজেপিৰ টিকট বঞ্চিত প্ৰাৰ্থিয়ে প্ৰতিদ্বন্দ্বিতা কৰি বিজয়ী হৈছিল৷
নীতিশ কুমাৰৰ জনতা দল (ইউৰ) সাতজনকৈ এনে প্ৰাৰ্থীয়ে বিজেপিৰ মনোনীত প্ৰাৰ্থীক পৰাজিত কৰি বিজয়ী হৈছিল৷ অভিযোগ উঠিছিল যে মুখ্যমন্ত্ৰী পেমা খান্দু আৰু টাপিৰ গাওৱে মিলি পচন্দৰ প্ৰাৰ্থীক বিধানসভালৈ গোপনে সমৰ্থন দি বিজয়ী কৰাই আনিছিল৷ সন্দেহ কৰা হৈছে যে আজিৰ এই ঘটনাত বিজেপিৰ পৰা পৰাজিত হোৱা কোনো প্ৰাৰ্থীৰ সমৰ্থকে এই কাণ্ড সংঘটিত কৰিছে৷