ডিজিটেল সংবাদ, ইটানগৰঃ অহা ১১ এপ্ৰিলত অৰুণাচল প্ৰদেশত অনুষ্টিত হ'ব লগা লোকসভা আৰু বিধানসভা নিৰ্বাচনৰ বাবে নিৰ্বাচন আয়োগে বিভিন্ন স্থানত ভ্ৰাম্যমান তালাচী তীব্ৰ কৰি তুলিছে৷ ৰাজধানী ইটানগৰ, আলং, পাকে কেচাং আদি ঠাইত বিগত পাঁচদিনত বিশেষ পৰ্যবেক্ষকৰ দলে ৩০ লাখৰো অধিক নগদ ধন জব্দ কৰিছিল৷
অৰুণাচল প্ৰদেশৰ লংডিঙত চলোৱা তালাচীত যোৱা নিশা পুনৰ জব্দ হয় বৃহৎ পৰিমানৰ নগদ ধন৷ আৰক্ষীৰ বিশেষ দল এটাই তালাচীৰ সময়ত এজন ব্যক্তিয়ে কঢ়িয়াই নিয়া ৩৪.৯ লাখ টকা জব্দ কৰে৷ লংডিং-খনচা পথৰ টিছা নামৰ ঠাইখনত জব্দ কৰে এই বৃহৎ পৰিমানৰ ধন৷ পুমান ৱাংচু নামৰ ব্যক্তিজনে এই ধনখিনি কঢ়িয়াই নিছিল৷
আৰক্ষীয়ে সন্দেহ কৰা মতে এই ধনখিনি নিৰ্বাচনত ব্যয় কৰাৰ বাবে বেংকৰ পৰা উলিয়াই নিছিল৷ জব্দ কৰা ধন খিনি মঙলবাৰে আয়কৰ বিভাগে লংডিং থানাৰ পৰা নিজৰ জিম্মালৈ নিয়ে৷