ডিজিটেল সংবাদ, ইটানগৰঃ অৰুণাচলৰ প্ৰাক্তন মুখ্যমন্ত্ৰী গেগং আপাঙে গঠন কৰিব এটা নতুন আঞ্চলিক ৰাজনৈতিক দল। প্ৰাক্তন মুখ্যমন্ত্ৰীগৰাকীয়ে ১৯ জানুৱাৰীত কলকতাত মমতা বেনাৰ্জীৰ সৈতে অংশ ল'ব বিজেপি বিৰোধী মহা সমাবেশত ৷ বিজেপিয়ে নাগৰিকত্ব সংশোধনী বিধেয়ক গৃহীত কৰিবলৈ চলোৱা চেষ্টাৰ বাবেই দল ত্যাগ কৰা বুলি মন্তব্য কৰে গেগং আপাঙে৷
ইফালে, নতুনকৈ গঠন হ'বলগীয়া আঞ্চলিক ৰাজনৈতিক দলটোৰ নাম হ'ব 'অৰুণাচল ডেম'ক্ৰেটিক ফ্ৰন্ট'। জানিব পৰা মতে, অৰুণাচলত আগন্তুক বিধান সভা আৰু লোকসভা নিৰ্বাচনত এ ডি এফ দলৰ পৰা প্ৰতিদ্বন্দ্বিতা আগবঢ়াব তেওঁ। লগতে ২১ জানুৱাৰী, ২০১৯ত সংবাদমেলযোগে প্ৰাক্তন মুখ্যমন্ত্ৰীগৰাীয়ে আনুষ্ঠানিক ঘোষণা কৰিব এই নতুন দলটোৰ বিষয়ে৷ বি জি পি বিৰোধী মহা গোটবন্ধনৰো অংশীদাৰ হ'ব আপাঙৰ নতুন দলটো ৷
উল্লেখ্য যে, ১৭ বছৰ ধৰি অৰুণাচলৰ মুখ্যমন্ত্ৰী হিচাবে কাৰ্যনিৰ্বাহ কৰিছিল গেগং আপাং ৷ বি জি পি দলৰ পৰাও অৰুণাচল তথা সমগ্ৰ উত্তৰ-পূৰ্বাঞ্চলতে প্ৰথমজন মুখ্যমন্ত্ৰী আছিল এই আপাং ৷ কিন্তু জাতিধ্বংসী এই বিধেয়কখনৰ বিৰোধিতা কৰি আপাঙে যোৱা মংগলবাৰে বি জি পিৰ পৰা পদত্যাগ কৰে ৷ আপাঙে দাবী কৰা মতে, অৰুণাচলৰ বহু নেতাই তেওঁৰ লগত যোগাযোগ কৰিছে আৰু এ ডি এফ শক্তিশালী ৰূপত আত্মপ্ৰকাশ কৰিব ৷