অৰুণাচলৰ মুখ্যমন্ত্ৰী হিচাপে শপত গ্ৰহণ পেমা খাণ্ডুৰ, অসম, মেঘালয়, মণিপুৰ, নাগালেণ্ড আৰু ত্ৰিপুৰাৰ মুখ্যমন্ত্ৰী উপস্থিত…

ডিজিটেল সংবাদ, ইটানগৰঃ দ্বিতীয়বাৰৰ বাবে অৰুণাচলৰ মুখ্যমন্ত্ৰী হিচাপে বুধবাৰে শপত গ্ৰহণ কৰিলে পেমা খাণ্ডুৱে৷ অৰুণাচলৰ ইতিহাসত প্ৰথমবাৰৰ বাবে ৰাজভৱনৰ পৰিৱৰ্তে দৰ্জী খাণ্ডু ষ্টেট কনভেন্সন চেন্টাৰত অনুষ্টিত হয় এই শপতগ্ৰহণ অনুষ্ঠান৷ অৰুণাচলৰ ৰাজ্যপাল বি ডি মিশ্ৰাই মুখ্যমন্ত্ৰী পেমা খাণ্ডু আৰু তেওঁৰ মন্ত্ৰীসভাৰ ১১ জনকৈ নৱনিৰ্বাচিত বিধায়কক শপত বাক্য পাঠ কৰোৱায় ৷

মুখ্যমন্ত্ৰী হিচাপে পেমা খাণ্ডুৱে শপত লোৱাৰ বিপৰীতে উপ মুখ্যমন্ত্ৰী হিচাপে শপত গ্ৰহণ কৰে চাওনা মেইনে ৷ তেওঁলোকৰ লগতে মন্ত্ৰী পদৰ বাবে শপত গ্ৰহণ কৰে বামাং ফেলিক্স, মামা নাটুং, টাগে টাকি, টুমকে বাগৰা, ৱাংকি লৱাং, টাবা টাদেৰ, হনচুম নংদম, কমলুং মোচাং আৰু নাকাব নালোৱে ৷

এই অনুষ্ঠানত নতুন কৈ জয়যুক্ত হোৱা দুজনকৈ সাংসদ ক্ৰমে টাপিৰ গাৱ আৰু কিৰেন ৰিজিজুৰ উপৰিও অসম, মেঘালয়, মণিপুৰ, নাগালেণ্ড আৰু ত্ৰিপুৰাৰ মুখ্যমন্ত্ৰীও উপস্থিত থাকে ৷

তাৰোপৰি নেডাৰ আহ্বায়ক হিমন্ত বিশ্ব শৰ্মা আৰু বিজেপিৰ উত্তৰ-পূৰ্বাঞ্চলৰ ইন-চাৰ্জ ৰাম মাধৱো উপস্থিত থাকে ৷ এই অনুষ্ঠানৰ বাবে ১১ হাজাৰ নিমন্ত্ৰণী পত্ৰৰ অতি ক্ষীপ্ৰতাৰে প্ৰেৰণ কৰা হৈছিল ৷

তাৰোপৰি কেপিটেল এছ পি টুম্মে আম'ই জনোৱা মতে কনভেন্সন চেন্টাৰ আৰু তাৰ কাষৰ সমগ্ৰ অঞ্চলত নিচিদ্ৰ নিৰাপত্তাৰ ব্যৱস্থা কৰা হৈছিল ৷