ডিজিটেল ডেস্কঃ তামিলনাডুৰ ত্ৰিচী বিমানবন্দৰত শুকুৰবাৰে ডুবাই অভিমুখে ৰাওনা হোৱা এয়াৰ ইণ্ডিয়াৰ এখন বিমান এক ভয়ংকৰ দুৰ্ঘটনাত পতিত হোৱাৰ পৰা কথমপি ৰক্ষা পৰে৷
ঘটনা অনুসৰি, শুকুৰবাৰে পুৱা ক্ৰিউ মেম্বাৰ সহ ১৩০ গৰাকী যাত্ৰী লৈ বিমানখন ত্ৰিচী বিমান বন্দৰৰ পৰা ডুবাই অভিমুখে উৰা মৰিছিল৷ কিন্তু যান্ত্ৰিক বিজুতিৰ বাবে বিমানখনে এখন পকী বেৰত খুন্দা মাৰে৷ অৱশ্যে বিমানখনৰ ভিতৰত থকা যাত্ৰীসকল ভয়ংকৰ দুৰ্ঘটনাৰ পৰা কথমপি ৰক্ষা পৰে৷
এই ঘটনাৰ পিছতে বিমানখন ডুবাইৰ পৰিৱৰ্তে মুম্বাইলৈ লৈ যোৱা হয়৷ তাৰ পৰা যাত্ৰী সকলক ডুবাইলৈ যোৱাৰ বাবে অইন এখন বিমানৰ ব্যৱস্থা কৰি দিয়া হয়৷
ইফালে এই ঘটনাক গম্ভীৰভাৱে লৈ বিমানখনৰ পাইলট আৰু সহযোগী পাইলটক সাময়িকভাৱে বৰ্খাস্ত কৰি নাগৰিক উদ্যোয়ন মহানিৰ্দেশকে ঘটনাৰ তদন্ত আৰম্ভ কৰিছে৷