ডিজিটেল ডেস্কঃ সমাগত ৫ ৰাজ্যৰ বিধানসভাৰ নিৰ্বাচন। ২০২২ বৰ্ষৰ প্ৰথম ভাগতে অনুষ্ঠিত হ'ব উত্তৰ প্ৰদেশ, গোৱা, পঞ্জাৱ, হিমাচ প্ৰদেশ আৰু মণিপুৰত অনুষ্ঠিত হ'ব বিধানসভাৰ নিৰ্বাচন। কিন্তু এই নিৰ্বাচনলৈ মাজত মাত্ৰ কেইটামান মাহ বাকী থকাৰ অৱস্থাত দেশত পুনৰ বৃদ্ধি পাইছে কোভিডৰ সংক্ৰমণ। কোভিডৰ লগতে নতুনকৈ সংক্ৰমিত হোৱা কোভিডৰ নতুন প্ৰকাৰ অমিক্ৰনো দেশত ব্যাপক হাৰত সংক্ৰমণ হৈছে।
এনে পৰিস্থিতিত নতুন বছৰটোৰ প্ৰথমভাগত নিৰ্বাচন অনুষ্ঠিত কৰাটো চিন্তাৰ বিষয় হৈ পৰিছে। এই সংক্ৰান্তত এলাহবাদ উচ্চ ন্যায়ালয়ে উত্তৰ প্ৰদেশৰ নিৰ্বাচন প্ৰয়োজন সাপেক্ষে পিছুৱাই দিবলৈ নিৰ্দেশনা প্ৰদান কৰিছিল। কিন্তু দেশৰ প্ৰধান ৰাজনৈতিক দল বিজেপি, কংগ্ৰেছকে ধৰি ৰাজ্যসমূহৰ আঞ্চলিক দলৰ লগতে নিৰ্বাচনত প্ৰতিদ্বন্দিতা আগবঢ়োৱা সকলে দলেই সময়মতেই নিৰ্বাচন অনুষ্ঠিত হোৱাটো বিচাৰিছে।
নিৰ্বাচনক কেন্দ্ৰ কৰিয়েই সকলো ৰাজনৈতিক দলে ইতিমধ্যে নিৰ্বাচনী কামকাজ আৰম্ভ কৰিছে। বিশেষকৈ উত্তৰ প্ৰদেশৰ নিৰ্বাচনক কেন্দ্ৰ কৰি ৰাজ্যখনলৈ সঘনে আগমণ ঘটিছে প্ৰধানমন্ত্ৰী মোডীৰ লগতে অন্যান্য নেতাৰ। প্ৰায় প্ৰতি সপ্তাহৰ মূৰে মূৰে উত্তৰ প্ৰদেশলৈ আগমণ ঘটিছে প্ৰধানমন্ত্ৰী মোডী।
ইয়াৰ মাজতে ৩ দিনীয়া ভ্ৰমণসূচীৰে উত্তৰ প্ৰদেশত উপস্থিত হৈছে দেশৰ মুখ্য নিৰ্বাচনী বিষয়াৰ লগতে নিৰ্বাচন আয়োগৰ এটা দল। দলটোৱে ৰাজ্যখনৰ পৰিস্থিতি পৰ্যবেক্ষণ কৰাৰ লগতে ৰাজনৈতিক দলৰ লগত মত বিনিময় কৰি সয়মতে নিৰ্বাচন অনুষ্ঠিত কৰিব বুলি উল্লেখ কৰিছে।
নিৰ্বাচন আয়োগে কৈছে যে সকলো দলে উত্তৰ প্ৰদেশত কোভিড প্ৰটোকলৰ সৈতে সময়মতে নিৰ্বাচন বিচাৰে। তেওঁলোকে সময়মতে নিৰ্বাচনৰ দাবী জনাইছে। ইউ পিত ১৫ কোটিতকৈও অধিক ভোটাৰ আছে। নিৰ্বাচন আয়োগৰ মতে, উত্তৰ প্ৰদেশত ৫২.৮ লাখ নতুন ভোটাৰ যোগ দিয়া হৈছে। চূড়ান্ত তালিকাখন ৫ জানুৱাৰীত আহিব। তাৰ পাছতো, তালিকাৰ ত্ৰুটিবোৰ নিষ্পত্তি কৰা হ'ব।
লক্ষ্ণৌত এখন সংবাদমেলত মুখ্য নিৰ্বাচন আয়ুক্ত সুশীল চন্দ্ৰই কয় যে ১৮ ৰ পৰা ১৯ বছৰ বয়সৰ নতুন ভোটাৰৰ সংখ্যা যোৱা নিৰ্বাচনতকৈ তিনিগুণ বেছি। এইবাৰ মহিলা ভোটাৰৰ অনুপাত বৃদ্ধি পাইছে। এইবাৰ নিৰ্বাচন আয়োগে বিধানসভা নিৰ্বাচনত কোৰোনা প্ৰটোকল যিকোনো মূল্যত অনুসৰণ কৰাৰ ওপৰত জোৰ দিছে। চন্দ্ৰই কৈছে যে উত্তৰ প্ৰদেশ কৰ্তৃপক্ষই আমাক কৈছে, যে জনসংখ্যাৰ ৫০ শতাংশক সম্পূৰ্ণৰূপে টিকাকৰণ কৰা হৈছে।
আমি আদেশ দিছো যে সকলোকে কমেও এটা ভেকছিনৰ পালি দিয়া হ'ব। প্ৰতিজন যোগ্য ব্যক্তিয়ে যিমান সম্ভৱ সোনকালে দ্বিতীয় পালিও দিয়া হওক। উত্তৰ প্ৰদেশৰ বিষয়াসকলৰ মতে উত্তৰ প্ৰদেশত এতিয়ালৈকে মাত্ৰ ৪ টা অমিক্ৰন ঘটনা আছে। আমি ইয়ালৈ অহাৰ আগতে কেন্দ্ৰীয় স্বাস্থ্য সচিবক ইতিমধ্যে সাক্ষাৎ কৰিছো, সকলো ভোটকেন্দ্ৰত কোৰোনা প্ৰটোকল অনুসৰণ কৰাটো নিশ্চিত কৰিছো।
তেওঁ কৈছে যে যোৱা দুটা উত্তৰ প্ৰদেশ নিৰ্বাচনত কম ভোটদান আমাৰ বাবে চিন্তাৰ বিষয় আৰু আমি ইয়াক পুংখানুপুংখভাৱে পৰ্যালোচনা কৰিছো আৰু বিষয়াসকলে অধিক সজাগতা সৃষ্টি কৰিবলৈ চেষ্টা কৰি আছে। আয়োগে সামাজিক দূৰত্বৰ সৈতে ভোটদান নিশ্চিত কৰিবলৈ ৰাজ্যজুৰি ভোটদানৰ সময় এক ঘণ্টা বৃদ্ধি কৰাৰ সিদ্ধান্ত লৈছে।