ডিজিটেল ডেস্কঃ পৃথিৱীৰ প্ৰথমখন ৫জি (5G)ৰ সুবিধা থকা জিলা হিচাপে পৰিগণিত হ'ল চীনৰ ছাংঘাইক। এই দাবী কৰিছে খোদ চীনে। শনিবাৰে চীনে দাবী কৰে যে ছাংঘাইত তেওঁলোকে ৫ জিৰ সুবিধা প্ৰদান কৰিছে। উল্লেখ্য যে, ৪জিতকৈ ১০ৰ পৰা ১০০ গুণ কম সময়ত ৫ জিত যিকোনো বস্তু ডাউনলোড কৰিব পাৰি।
৫জিৰ ক্ষেত্ৰত চীনে আমেৰিকা তথা সমগ্ৰ বিশ্বতকৈ আগত থাকিবলৈ চেষ্টা অব্যাহত ৰাখিছে। চীন চৰকাৰৰ এখন বাতৰি কাকত প্ৰকাশিত বাতৰি অনুসৰি, সমগ্ৰ বিশ্বৰ ভিতৰত প্ৰথম ৫ জি কভাৰেজ আৰু ব্ৰডবেণ্ড গিগাবিট নেটৱৰ্ক থকা প্ৰথমখন জিলা হিচাপে ছাংঘাইক দাবী কৰিছে।
ইফালে, ৫ জি নেটৱৰ্কৰ পৰীক্ষাৰ বাবে চীন চৰকাৰৰ দূৰসঞ্চাৰ কোম্পানী চাইনা ম'বাইলে সমৰ্থন জনাইছিল। ৫ জিৰ পৰীক্ষামূলক ব্যৱহাৰ সফলতাৰে সম্পন্ন কৰিবলৈ ছাংঘাইত যোৱা ৩ মাহ ধৰি ৫জি ষ্টেচন স্থাপন কৰি ৰখা হৈছে। চাইনা ডেলীয়ে কয় যে, ছাংঘাইৰ ভাইচ-মেয়ৰ বু কুৱিঙে প্ৰথমবাৰৰ বাবে ৫ জি ব্যৱহাৰ কৰিব পৰা ম'বাইল ফোন 'হুৱাই মেট এক্স'ৰ পৰা ৫ জি ভিডিঅ' কল কৰিছে।
আনহাতে, সকলো পৰীক্ষা সফলতাৰে সম্পূৰ্ণ কৰাৰ পাছত গ্ৰাহকে ছিমকাৰ্ড সলনি নকৰাকৈয়ে ৫জিৰ সুবিধা লাভ কৰিব। ৫জিৰ নেট ব্ৰাউজিং স্পীডৰ অনুমান ইয়াতেই কৰিব পাৰি যে- যিবোৰ ফিল্ম ডাউনলোড কৰিবলৈ পূৰ্বে ১০-২০মিনিট সময়ৰ প্ৰয়োজন হৈছিল, সেইবোৰ এতিয়া ১-২ মিনিটতে ডাউনলোড কৰিব পাৰিব।