ডিজিটেল সংবাদ, টিহুঃ নলবাৰী জিলাৰ টিহু থানাৰ অন্তৰ্গত নমাটি গাঁৱত শনিবাৰে পুৱা বৃহৎ পৰিমাণৰ গাঞ্জা উদ্ধাৰ হোৱা ঘটনাই সমগ্ৰ অঞ্চলজুৰি ব্যাপক চাঞ্চল্যৰ সৃষ্টি কৰিছে । ঘটনা সন্দৰ্ভত জানিবলৈ পোৱা অনুসৰি নমাটি মজলীয়া বিদ্যালয়ৰ সমীপতে পথৰ দাঁতিত গাঁওখনৰ একাংশ লোকে আটোমটোকাৰিকৈ বন্ধা কেইবাটাও টোপোলা দেখা পোৱাৰ পাছত বিষয়টো লৈ অঞ্চলটোত কৌতূহলৰ সৃষ্টি হয় ।
গাঁওবাসীয়ে লগে লগে বিষয়টো টিহু থানাৰ আৰক্ষীক অৱগত কৰোৱাত আৰক্ষীয়ে লগে লগে ঘটনাস্থলীলৈ গৈ ১৮ টা টোপোলা উদ্ধাৰ কৰে । পৰীক্ষা কৰি টোপোলাবোৰত গাঞ্জা থকা বুলি নিশ্চিত হয় আৰু আৰক্ষীয়ে টিহু থানালৈ লৈ যায় ।
উদ্ধাৰ হোৱা গাঞ্জাৰ মুঠ ওজন হৈছে প্ৰায় ১৭৫ কিলোগ্ৰাম । বিদ্যালয়ৰ সমীপতে এনেদৰে কি পৰিস্থিতিত ইমান পৰিমাণৰ গাঞ্জা উদ্ধাৰ হ'ল, সেই বিষয়টো লৈ বাতৰি লিখা পৰলৈ সমগ্ৰ অঞ্চলজুৰিত চাঞ্চল্য অব্যাহত আছে ।