ডিজিটেল সংবাদ, চামগুৰিঃ নগাঁও আৰক্ষীৰ মূৰৰ কামোৰনি হৈ পৰা দূৰ্ধষ হত্যাকাৰী তথা চোৰ আব্দুল কাদিৰক বুধবাৰে নিশা চামগুৰি আৰক্ষীয়ে গ্ৰেপ্তাৰ কৰিবলৈ সক্ষম হৈছে৷ ২০১৮ বৰ্ষৰ ২৯ ডিচেম্বৰত চামগুৰি আৰক্ষী থানাৰ অধীনৰ বৰমা বিলত নিশা ছাগলী চুৰ কৰিবলৈ আহি গৃহস্থৰ সৈতে মুখামুখি হোৱাত গভাইত চোৰ আব্দুল কাদিৰে আন কেইবাজনো সহযোগীৰ লগত এএছ০২-ইউ-১৩১৫ নম্বৰৰ এখন এল্ট' গাড়ীৰে গৃহস্থ আব্দুল হাইক ৰচী লগাই হিন্দী চিনেমাৰ ষ্টাইলত চোঁচৰাই হত্যা কৰি পথৰ কাষত পেলাই থৈ গৈছিল৷
পৰৱতী সময়ত আৰক্ষীয়ে অনুসন্ধান কৰি হত্যাকাণ্ডত ব্যৱহৃত গাড়ীসহ আন এক অভিযুক্ত আনাৰুল হকক নগাঁও লাওগাঁৱৰ পৰা গ্ৰেপ্তাৰ কৰিবলৈ সক্ষম হৈছিল৷ ঘটনা সংঘটিত কৰিয়েই হত্যাকাণ্ডৰ আন এক মূল অভিযুক্ত আব্দুল কাদিৰে আৰক্ষীৰ চকুত ধুলি দি পলাতক হৈ আছিল৷ বুধবাৰে নিশাও মূল হত্যাকাৰী তথা গভাইত চোৰ আব্দুল কাদিৰে ৰূপহীহাটত গৰু চোৰ কৰিবলৈ যোৱাত স্থানীয় লোকৰ সহযোগত আৰক্ষীয়ে গ্ৰেপ্তাৰ কৰিবলৈ সক্ষম হয়৷
ধৃত আব্দুল কাদিৰৰ ঘৰ নগাঁও লাওগাঁৱত বুলি জানিব পৰা গৈছে৷ চামগুৰি আৰক্ষীয়ে হত্যাকাৰী তথা গভাইত চোৰ আব্দুল কাদিৰৰ বিৰুদ্ধে চামগুৰি আৰক্ষী থানাত ৮৪০/১৮ নম্বৰত এক গোচৰ ৰজু কৰি ভাৰতীয় দণ্ড বিধি আইনৰ ৩৮০/৩০২ ধাৰাৰ অধীনত ৰঙাঘৰলৈ প্ৰেৰণ কৰে বুলি জানিব পৰা গৈছে।