ডিজিটেল সংবাদ, শিমলুগুৰিঃ লখিমপুৰ জিলাৰ শিমলুগুৰি আৰক্ষী চকীৰ অন্তৰ্গত কোকছাবাৰীৰ তিনি সন্তানৰ এজন ব্যক্তিয়ে আত্মহত্যা কৰা ঘটনাই অঞ্চলটোত তীব্ৰ চাঞ্চল্যৰ সৃষ্টি কৰিছে ৷ পাৰিবাৰিক কন্দলৰ বাবেই আত্মহত্যা কৰে কোকছাবাৰীৰ নিবাসী চন্দ্ৰ দাহাল(৫০)নামৰ ব্যক্তিগৰাকীয়ে ৷
প্ৰাপ্ত তথ্যমতে যোৱাকালি সন্ধিয়া চন্দ্ৰৰ নিজাগৃহত স্বামী-স্ত্ৰীৰ মাজত কাজিয়াৰ সূত্ৰপাত ঘটে ৷ কাজিয়াৰ এনে ৰুপ ধাৰণ কৰে যে অৱশেষত গাঁৱৰ একাংশ ৰাইজে তেওঁলোকৰ গৃহত উপস্থিত হৈ উক্ত কাজিয়া ভাঙিবলগীয়া পৰিবেশৰ সৃষ্টি হৈছিল ৷
কিন্তু অতি পৰিতাপৰ বিষয় চন্দ্ৰই ৰাতি প্ৰায় ১ বজাত বিহপান কৰে ৷ পৰিয়ালৰ লোকে উক্ত ঘটনা ওচৰ চুবুৰীয়াক অৱগত কৰাত কেইজনমান ব্যক্তিয়ে ৰাতিয়েই চন্দ্ৰক চিকিৎসাৰ বাবে লখিমপুৰ অসামৰিক চিকিৎসালয়লৈ লৈ যায় ৷ কিন্তু চন্দ্ৰই চিকিৎসাধীন অৱস্থাত আজি পুৱা ৮ বজাত মৃত্যুক আকোঁৱালি লয় ৷