ডিজিটেল সংবাদ, কোকৰাঝাৰঃ কোকৰাঝাৰ জিলাৰ ছালাকাটি আৰক্ষী চকীৰ অন্তৰ্গত আশ্ৰমপাৰাত সোমবাৰে সন্ধিয়া সংঘটিত হয় হত্যাকাণ্ড। কোনো অচিনাক্ত দুষ্কৃতিকাৰীয়ে বিহাৰৰ শ্ৰমিক এজনক হানিখুচি হত্যা কৰা এক ঘটনাই চাঞ্চল্যৰ সৃষ্টি কৰিছে৷ আৰক্ষীৰ সূত্ৰ অনুসৰি নিহত শ্ৰমিকজন বিহাৰৰ বেগুশৰাই জিলাৰ বিষ্ণুপুৰ গাঁৱৰ বাসিন্দা মহম্মদ ছাকিল বুলি জনা গৈছে৷
জানিব পৰা মতে, ছালাকাটিৰ আশ্ৰমপাৰাত দীৰ্ঘদিনৰ পৰা ভাড়াঘৰত থাকি মহম্মদ ছাকিলে এনটিপিচিত শ্ৰমিক হিচাপে কাম কৰিছিল৷ ভাড়াঘৰটোত আন তিনিজন শ্ৰমিক ক্ৰমে-সাহাব উদ্দিন আলম (২০), ছিকান্দৰ কুমাৰ (১৯) আৰু সন্তোষ কুমাৰ ( ২০) সন্ধিয়া বজাৰলৈ গৈছিল। তাৰ সুযোগলৈ দুৰ্বৃত্তই ছাকিলক ঘৰৰ ভিতৰত সোমাই হানি খুচি হত্যা কৰে ছাকিলক৷
ইয়াৰ পিছত তিনি সতীৰ্থ বজাৰৰ পৰা ভাড়াঘৰটোলৈ ঘূৰি অহাত ছাকিলৰ ক্ষতবিক্ষত নশ্বৰ দেহ মাটিত পৰি থকা প্ৰত্যক্ষ কৰি আৰক্ষীক খবৰ দিয়ে৷ সম্প্ৰতি হত্যাৰ ঘটনা সংক্ৰান্তত ছালাকাটি আৰক্ষীয়ে ইতিমধ্যে সোধ পোছৰ বাবে নিহত ছাকিলৰ তিনি সতীৰ্থ শ্ৰমিকক আটক কৰি জেৰা অব্যাহত ৰাখিছে৷