মথুৰাপুৰ শংকৰদেৱ শিশু বিদ্যা নিকেতনত কৃতী ছাত্ৰ-ছাত্ৰীক সম্বৰ্ধনা...

ডিজিটেল সংবাদ, মথুৰাপুৰঃ গুণগত শিক্ষা প্ৰসাৰণৰ লগতে সাংস্কৃতিক আৰু বৌদ্ধিক উত্তৰণৰ দিশত অমূল্য অৱদান আগবঢ়াই অহা মথুৰাপুৰ শংকৰদেৱ শিশু বিদ্যা নিকেতনত বৃহস্পতিবাৰে অনুষ্ঠিত হয় কৃতিমানক সম্বৰ্ধনা অনুষ্ঠান ৷ পৰিচালনা সমিতিৰ সভাপতি ক্ষিৰোদ গগৈ সমাজকৰ্মী মুনীন ৰাজকোঁৱৰ, প্ৰদীপ গগৈ, মথুৰাপুৰ উচ্চতৰ মাধ্যমিক বিদ্যালয়ৰ শিক্ষক আদিত্য বৰঠাকুৰ, প্ৰধান আচাৰ্য টুটুমণি বৰগোহাঁইকে ধৰি আচাৰ্য-আৰ্চাযা আৰু অঞ্চলটোৰ ভালেকেইজন বিশিষ্ট ব্যক্তিয়ে অনুষ্ঠানটিত অংশগ্ৰহণ কৰে ।

সদ্য ঘোষিত হাইস্কুল শিক্ষান্ত পৰীক্ষাত শিক্ষানুষ্ঠান খনৰ পৰা সু-খ্যাতিৰে উত্তীৰ্ণ হোৱা কৃতী ছাত্ৰ-ছাত্ৰীসকলক একোটাকৈ ফাইল কভাৰ,কলম, গামোছাৰে সম্বৰ্ধনা জনোৱা হয় ৷ উল্লেখ্য যে,পূৰ্বৰ বৰ্ষ সমূহৰ দৰে এইবছৰো বিদ্যালয়খনৰ এশ শতাংশ ছাত্ৰ-ছাত্ৰীয়েই হাইস্কুল শিক্ষান্ত পৰীক্ষাত উত্তীৰ্ণ হৈছে । বিদ্যালয়খনৰ পৰা এইবাৰ অৱতীৰ্ণ হোৱা ৩৯ গৰাকী ছাত্ৰ-ছাত্ৰীৰ ভিতৰত১৮ গৰাকীয়ে প্ৰথম বিভাগ আৰু ১৯ গৰাকী শিক্ষাৰ্থীয়ে দ্বিতীয় বিভাগ আৰু দুগৰাকীয়ে তৃতীয় বিভাগত উত্তীৰ্ণ হয়। ইয়াৰে প্ৰেৰণা বুঢ়াগোহাঁইয়ে ডিষ্টিংচন আৰু তিনি গৰাকী শিক্ষাৰ্থীয়ে ষ্টাৰ নম্বৰ পাবলৈ সক্ষম হৈছে।