ধনশিৰিত হিন্দী পৰীক্ষাৰ পৰা বঞ্চিত ২৩ গৰাকী হাইস্কুল শিক্ষান্ত কম্পাৰ্টমেন্টেল পৰীক্ষাৰ্থী… VIDEO

ডিজিটেল সংবাদ, সৰুপথাৰঃ চলিত বৰ্ষত ছেবাই অনুষ্ঠিত কৰা হাইস্কুল শিক্ষান্ত কম্পাৰ্টমেন্টেল পৰীক্ষাৰ সময়সূচী দুখন হোৱাৰ কাৰণে গোলাঘাট জিলাৰ বৰপথাৰ উচ্চতৰ মাধ্যমিক বিদ্যালয় পৰীক্ষাকেন্দ্ৰৰ ২৩গৰাকী ছাত্ৰ-ছাত্ৰী হিন্দী(ঐচ্চিক) বিষয়ৰ পৰীক্ষা দিয়াৰ পৰা বঞ্চিত হ'বলগীয়া হ'ল৷

বঞ্চিত ছাত্ৰ-ছাত্ৰীসকলৰ অভিযোগ অনুসৰি সৰুপথাৰৰ চুকীয়াপথাৰ শ্বহীদ কুশল কোঁৱৰ হাইস্কুলৰ প্ৰধান শিক্ষকৰ স্বাক্ষৰিত প্ৰথমখন সময়সূচীমতে ৬ জুলাইত হিন্দী পৰীক্ষা আছিল যদিও ছেবাই দিয়া নতুন সময়সূচীমতে ২ জুলাইতহে হিন্দী পৰীক্ষাৰ দিন ধাৰ্য্য কৰা আছিল৷

ফলত বৃহস্পতিবাৰে ইংৰাজী পৰীক্ষা দিবলৈ আহিহে ছাত্ৰ-ছাত্ৰীসকলে নতুন সময়সূচীৰ কথা গম পাই বিমোৰত পৰে ৷ ইফালে, বৰপথাৰ পৰীক্ষাকেন্দ্ৰৰ মুৰব্বীয়ে জানিবলৈ দিয়ামতে ছেবাৰ পৰা অহা দ্বিতীয়খন সময়সুচী পৰীক্ষালৈ কেইটামান দিন থাকোতেহে কেন্দ্ৰটোলৈ আহিছিল আৰু লগে লগে উক্ত সমযসূচী বিতৰণ কৰা হৈছিল৷

কিন্তু ছাত্ৰ-ছাত্ৰীসকলে জনোৱা মতে, তেঁওলোকৰ বিদ্যালয়ৰ প্ৰধান শিক্ষকে নতুন সময়সূচী লাভ কৰা নাছিল৷ কোন সঁচা আৰু কোন মিছা? দোষ যাৰেই নহওক কিয় ২৩ গৰাকী ছাত্ৰ-ছাত্ৰীৰ যে ১ টা বছৰ নষ্ট হ'ল, তাৰ দায়িত্ব কোনে ল'ব?

ইফালে, স্থানীয় আছুৰ দাবী- সমগ্ৰ বিষয়টো সঠিক তদন্ত হোৱাৰ লগতে ছাত্ৰ-ছাত্ৰীৰ জীৱনক লৈ হেতালি খেলা সকলে উচিত শাস্তিৰ দাবী জনাইছে৷ উক্ত ঘটনা সমগ্ৰ মহকমাটোত তীব্ৰ প্ৰতিক্ৰিয়াৰ সৃষ্টি কৰিছে৷