ডিজিটেল সংবাদ, মঙলদৈঃ জাতিধ্বংসী নাগৰিকত্ব সংশোধনী বিধেয়ক, ২০১৬ কেবিনেটে অনুমোদন জনোৱাৰ প্ৰতিবাদত সমগ্ৰ অসমৰ লগতে অসম প্ৰদেশ কংগ্ৰেছ কমিটীৰ আহ্বানত শুকুৰবাৰে দৰং জিলা কংগ্ৰেছ কমিটীয়েও দৰং জিলা পুথিভঁৰাল প্ৰাংগনত ৭ ঘণ্টীয়া অনশন কাৰ্যসূচী ৰূপায়ণ কৰে।
পুৱা ৮ বজাৰ পৰা আবেলি ৩ বজালৈ চলা এই প্ৰতিবাদী কাৰ্যসূচীত চৰকাৰ বিৰোধী বিভিন্ন শ্ল'গানেৰে পৰিৱেশ উত্তাল কৰি তোলে প্ৰতিবাদকাৰীসকলে। প্ৰতিবাদী কাৰ্যসূচীত দৰং কংগ্ৰেছৰ সভাপতি ওৱাহিদা আহমেদৰ লগতে জিলা, ব্লক পৰ্যায়ৰ নেতা-কৰ্মীৰ উপৰিও অসম চৰকাৰৰ প্ৰাক্তন মন্ত্ৰী বসন্ত কুমাৰ দাস উপস্থিত থাকে।