ডিজিটেল সংবাদ, তিনিচুকীয়া: উজনি অসমৰ প্ৰায় দুই শতাধিক যুৱকে আলফা স্বাধীনত যোগদান কৰাৰ খবৰ প্ৰকাশ পোৱাৰ পাছত এইবাৰ সেনাৰ জালত পৰিছে নিষিদ্ধ ঘোষিত সংগঠনটোত ভৰ্তি হ'বলৈ যো-জা চলোৱা ৭জনকৈ যুৱক।
সেনাৰ পৰা পোৱা তথ্য অনুসৰি, তিনিচুকীয়া জিলাৰ কাকপথাৰ থানাৰ অন্তৰ্গত বৰালী গাঁৱৰ একাংশ যুৱকে নিষিদ্ধ ঘোষিত সংগঠনটোত যোগ দিবলৈ সাজু হোৱাৰ সময়তে সেনাই চোৰাংচোৱাৰ তথ্যৰ ভিত্তিত সাতজনকৈ যুৱকক আটক কৰা ঘটনাই উজনি অসমত আলফা স্বাধীনৰ স্থিতি সম্পৰ্কে প্ৰশাসনক পুনৰ শংকিত কৰি তুলিছে৷
উল্লেখ্য যে আলফা স্বাধীনৰ নেতৃবৰ্গই নিজ সংগঠনক শক্তিশালী কৰাৰ সমান্তৰালভাৱে যুৱপ্ৰজন্মৰ একাংশক উসাহিত কৰি নিৰাপত্তাৰক্ষীৰ বিৰুদ্ধে যুঁজাৰ বাবে সময়ে সময়ে সদস্যভৰ্তি অভিযান চলাই আহিছে যাতে অভাৰ গ্ৰাউণ্ড চোৰাংচোৱা হিচাপে ভাৰতীয় সৈন্যবাহিনীৰ তথ্যসমূহ যোগান ধৰে৷
যোৱা ৫ আগষ্টৰ পৰা সেনাৰ ডাও ডিভিজনে এই মতিভ্ৰমী যুৱকসকলক বিদ্ৰোহী সংগঠনত যোগদান কৰাৰ পুৰ্বে পুনৰ ওভতাই অনাৰ বাবে এক পদক্ষেপ গ্ৰহণ কৰি আভিযান আৰম্ভ কৰিছে৷ এই অভিযানতে, কাকপথাৰ থানাৰ অন্তৰ্গত বৰালী গাঁৱৰ সাতজনকৈ যুৱক আলফা স্বাধীনত যোগদান কৰিবলৈ যোৱা বুলি চোৰাংচোৱাৰ পৰা লাভ কৰা তথ্যৰ ভিত্তিত মণিকান্ত মৰাণ নামৰ অভাৰ গ্ৰাউণ্ড আলফা (লিংকমেন) সদস্যজনক আটক কৰাৰ উপৰিও বিমান মৰাণ, মিলন মৰাণ সহিতে আৰু চাৰিগৰাকী যুৱকক সেনাই আটক কৰি আনে৷
সেনাৰ সূত্ৰই সদৰী কৰা মতে, আটকাধীন বিমান মৰাণ নামৰ যুৱকজনে সামৰিক পোচাক পৰিধান কৰাৰ লগতে এখন মটৰ চাইকেল আৰু ২০ লিটাৰ ডিজেল উদ্ধাৰ কৰিছে৷ জেৰাৰ কালত বিমান মৰাণে স্বীকাৰ কৰে যে, এই দলটোত ইণ্ডো-ম্যানমাৰ সীমান্তত বাহৰ পাতি থকা আলফা স্বাধীনৰ সদস্যই তেওঁলোকক আগবঢ়াই নিয়াৰ কথা আছিল। লগতে এই কথাও জানিবলৈ দিয়ে আলফাত যোগদান কৰিবলৈ সাজু হৈ থকা এনে বহু যুৱকক প্ৰশিক্ষণৰ বাবে ম্যানমাৰত থকা আলফা স্বাধীনৰ সামৰিক শিবিৰলৈ যাবলৈ সাজু হৈ আছে।
