ডিজিটেল ডেস্কঃ ৬৭ বছৰ বয়সত মৃত্যু হ'ল সুষমা স্বৰাজৰ। প্ৰাক্তন বিদেশ মন্ত্ৰী তথা বিজেপিৰ জ্যেষ্ঠ নেত্ৰীগৰাকীৰ অন্ত্যেষ্টিক্ৰিয়া সম্পন্ন হ'ল ৰাষ্ট্ৰীয় মৰ্যাদাৰে। সুষমা স্বৰাজৰ জন্ম হৈছিল হাৰিয়ানাত।
ৰাজনীতিলৈ অহাৰ পূৰ্বে সুষমা স্বৰাজে উচ্চতম ন্যায়ালয়ৰ অধিবক্তা ৰূপে কৰ্মজীৱনৰ পাতনি মেলিছিল। ২৭ বছৰ বয়সতে হাৰিয়ানাৰ মন্ত্ৰী হৈছিল সুষমা স্বৰাজ।
সুষমা স্বৰাজ আছিল এক প্ৰতিবাদী কণ্ঠ। ১৯৭৫চনত সুষমা স্বৰাজে স্বৰাজ কুশলৰ সৈতে বিবাহপাশত আৱদ্ধ হৈছিল। মৃত্যুৰ পূৰ্বে বৈবাহিক জীৱনৰ ৪৪ বছৰ সম্পূৰ্ণ কৰিছিল দুয়ো।
১৯৭৭চনত হাৰিয়ানাৰ কেবিনেট মন্ত্ৰী ৰূপে শপত লৈছিল সুষমা স্বৰাজে। তেওঁ আছিল আটাইতকৈ কনিষ্ট কেবিনেট মন্ত্ৰী। ৰাজ্যপাল জে লাল হাঠীয়ে শপতবাক্য পাঠ কৰাইছিল সুষমা স্বৰাজক।
দিল্লীৰ মুখ্যমন্ত্ৰী ৰূপেও কাৰ্যনিৰ্বাহ কৰিছিল সুষমা স্বৰাজে। কেৱল বিজেপিৰেই নহয়, আন ৰাজনৈতিক দলৰ নেতাৰো প্ৰিয়পাত্ৰ আছিল সুষমা স্বৰাজ।
জয়প্ৰকাশ নাৰায়ণৰ সৈতে সুসম্পৰ্ক আছিল সুষমা স্বৰাজৰ। তেওঁৰ পিতৃ আছিল আৰ এছ এছৰ নেতা।
১৯৯৮চনত লোকসভা নিৰ্বাচনত জয়ী হৈছিল সুষমা স্বৰাজ। কেবিনেট মন্ত্ৰী ৰূপে সুষমা স্বৰাজে স্থান লাভ কৰিছিল অটল বিহাৰী বাজপেয়ীৰ মন্ত্ৰী সভাত।
আন্তঃৰাষ্ট্ৰীয় নেতাসকলৰ মাজতো সুষমা স্বৰাজ আছিল সুপৰিচিত। বিদেশ মন্ত্ৰী ৰূপে মোডীৰ প্ৰথমটো কাৰ্যকালত সুষমা স্বৰাজে অসুস্থতাৰ মাজতে সুচাৰুৰূপে দায়িত্ব পালন কৰিছিল।
লালকৃষ্ণ আদৱানী, অটল বিহাৰী বাজপেয়ীৰ দৰে নেতাৰ প্ৰিয় পাত্ৰ আছিল সুষমা স্বৰাজ।
সুষমা স্বৰাজৰ স্বামীক স্বৰাজ কুশলে অতি সাধাৰণভাৱে জীৱন-যাপন কৰে। দুয়োৰে মাজত আছিল যথেষ্ট বুজাবুজি।
বিৰোধী পক্ষৰ নেতাৰ সৈতেও সুষমা স্বৰাজে সুসম্পৰ্ক বজাই ৰাখিছিল।
কুকুৰ ভাল পাইছিল সুষমা স্বৰাজে। ঘৰত থকা সময়ত ব্যস্ততাৰ মাজতে তেওঁ যতন লৈছিল পোহনীয়া কুকুৰটোৰ।
৬ আগষ্ট, ২০১৯ত শেষ নিশ্বাস ত্যাগ কৰা সুষমা স্বৰাজৰ অন্ত্যেষ্টিক্ৰিয়া সম্পন্ন হয় ৭ আগষ্ট, ২০১৯ত। অন্ত্যেষ্টিক্ৰিয়াত অসুস্থ শৰীৰেৰে অংশ ল'লে এল কে আদৱানীয়ে। প্ৰধানমন্ত্ৰী মোডী, ৰাজনাথ সিঙে হাতত ধৰি আগবঢ়াই আনিছিল জ্যেষ্ঠ নেতাগৰাকীক।