ডিজিটেল সংবাদ, তেজপুৰঃ সাগৰীয় ভয়ংকৰ ধুমুহা আন্ফানৰ প্ৰভাৱত বিগত কেইবাদিনো ধৰি অৰুণাচলত হৈ থকা নেৰানেপেৰা বৰষুনৰ ফলত আজি পুৱাৰে পৰা হঠাৎ ফেনেফোটোকাৰে বাঢ়ি আহিছে জীয়াভৰলী নদী । শোণিতপুৰ জিলাৰ তেজপুৰ , ৰঙাপৰা আৰু চতিয়া বিধান সভা সমষ্টিৰ মাজেৰে ব্ৰহ্মপুত্ৰলৈ বৈ যোৱা জীয়াভৰলী নদীৰ প্ৰৱল বানে আজি খনামুখৰ বালিগাঁৱৰ বিস্তীৰ্ন এলেকাৰ কৃষি ভূমি বুৰাই পেলাই ।
এইক্ষেত্ৰত খণামুখ বালিগাঁৱৰ যুৱ কৃষক পৱিত্ৰ মিলিয়ে কয় কালি নিশাৰ পৰাই জীয়াভৰলী নদীখন প্ৰৱল ৰূপত বাঢ়ি আহি আজি পুৱাৰ পৰা অঞ্চলটোৰ বৃহৎ এলেকাৰ কৃষি ভূমি বুৰাই পেলাই । উল্লেখ্য যে খনামুখৰ বালিগাঁৱৰ লগতে মজুৱা , টৌভঙা চাপৰি , মতিকল চাপৰি আৰু কেকোকলি মিছিং গাৱকে ধৰি বৃহত্তৰ অঞ্চলটোৰ সহস্ৰাধিক বিঘা কৃষি ভূমি জীয়াভৰলী নদীৰ বানৰ কবলত পৰিছে ।
ইয়াৰোপৰি বানত অঞ্চলটোৰ কেইবাটাও পথ জীয়াভৰলী নদীৰ পানীয়ে বুৰাই পেলোৱা বুলি জানিব পৰা গৈছে । স্থানীয় ৰাইজে জনোৱা মতে জীয়াভৰলী নদীৰ পানী প্ৰৱল ৰূপত বাঢ়িয়েই আছে । ইফালে ৰঙাপৰা সমষ্টিৰ অৰ্ন্তগত বেদাজান আৰু ৰাজগড় অঞ্চলতো জীয়াভৰলী নদীৰ বান গৰাখহনীয়াই ৰাইজৰ প্ৰতি ভাবুকিৰ সৃষ্টি কৰিছে ।
এইক্ষেত্ৰত জানিব পৰা মতে মাত্ৰ বেদাজান আৰু ৰাজগড় অঞ্চলত কেইদিনমানৰ ভিতৰতে বৃহৎ পৰিমানৰ কৃষি ভূমি জীয়াভৰলী নদীত জাহ গৈছে। আনহাতেদি জীয়াভৰলী নদী ফেনেফোটোকাৰে বাঢ়ি থকাত তেজপুৰৰ কৰৈয়নী নেপালী , চিৰুৱানী আৰু ৰাজভড়ালকে নৈপৰীয়া ৰাইজ অতিকৈ চিন্তিত হৈ পৰিছে ।
ইফালে ধাৰাসাৰ বৰষুনৰ ফলত তেজপুৰ চহৰৰ নিকটৱৰ্ত্তি গৰৈমাৰী অঞ্চলত সৃষ্টি হোৱা কৃটিম বানৰ ফলত তেজপুৰ বায়ুসেনা ঘাটি সংযোগী গড়কপ্তানী বিভাগৰ মুল পথটোও সৰ্ম্পুনৰূপে বুৰ যায় । ইয়াৰোপৰি এই কৃটিম বানে গৰৈমাৰী ব্যৱসায়ীক কেন্দ্ৰৰ বৃহৎ এলেকাৰ লগতে ১৫ নং ৰাষ্ট্ৰীয় ঘাই পথটোৰো বহু বুৰাই পেলাই । আনহতেদি জীয়াভৰলী নদীৰ বান ভয়াবহ ৰূপত বাঢ়ি থকাত ৰাইজ চিন্তিত হৈ পৰিছে ।