ডিজিটেল সংবাদ, শিলচৰঃ যি সময়ত স্বাস্থ্যখণ্ডত বিশেষ উন্নতি হোৱা বাবে ৰাষ্ট্রীয় পৰ্যায়ত অসমে স্বীকৃতি লাভ কৰিছিল, ঠিক সেই সময়তে ৰাজ্যৰ স্বাস্থ্যখণ্ডৰ ফোপোলা স্বৰূপ উদঙাই দিলে শিলচৰৰ হাজাৰ হাজাৰ লোকে । ডেৰশ বছৰীয়া বৰ্ষপূৰ্তি উদযাপন কৰি বা: বা: লোৱা শিলচৰ চিকিৎসা মহাবিদ্যালয় হাস্পতাল কতৃপক্ষৰ বিৰুদ্ধে ৰাজ পথলৈ ওলাই আহিল শিলচৰৰ হাজাৰ হাজাৰ লোক ।
ৰাজ্যৰ স্বাস্থ্য বিভাগৰ ফোপোলা স্বৰূপ উদঙাই শুকুৰবাৰে সন্ধিয়া শিলচৰৰ ৰাজপথত হাজাৰ হাজাৰ লোক প্ৰতিবাদত নামিল ৷ হাতত মমবাতি শিখা লৈ প্রতিবাদী সমদল উলিয়াইছে শিলচৰৰ হাজাৰ হাজাৰ লোকে । SMC হাস্পতালত বিনা চিকিৎসাই মৃত্যু বৰণ কৰা ২৫ বছৰীয়া স্বায়ন্তন চক্ৰৱৰ্তী নামৰ যুৱক জনৰ মৃত্যুৰ প্রতিবাদত শুকুৰবাৰে এক বিশাল প্রতিবাদী সমদল উলিয়ায় শিলচৰৰ কেবা হাজাৰ লোকে ।
যোৱা বিজয়া দশমীৰ দিনা হৃদৰোগত আক্ৰান্ত হোৱা স্বায়ন্তন চক্ৰৱৰ্তী নামৰ উচ্চ শিক্ষিত আৰু মেধা যুৱক জনক ভৰ্তি কৰা হৈছিল শিলচৰ চিকিৎসা মহাবিদ্যালয় হাস্পতালত । কিন্তু দক্ষিণ অসমৰ একমাত্র উন্নত চিকিৎসা মহাবিদ্যালয় হাস্পতালখনত কাৰ্ডিওলজি বিভাগত কোনো বিশেষজ্ঞ চিকিৎসক নথকাত স্বায়ন্তনক কোনো চিকিৎসা প্ৰদ্ন কৰিব পৰা নাছিল হাস্পতাল কতৃপক্ষই ৷ বিনা চিকিৎসাই স্বায়ন্তনক শ্বিলঙৰ নিগ্ৰিমছলৈ ৰেফাৰ কৰিছিল SMC হাস্পতাল কতৃপক্ষই ।
ইফালে, নিগ্ৰিমছলৈ নিয়াৰ পথতে মৃত্যু হয় স্বায়ন্তনৰ । ইয়াৰ পিচতে ৰাজ্যৰ বিয়াগোম স্হাস্হ্য বিভাগ আৰু SMC হাস্পতাল কতৃপক্ষৰ বিৰুদ্ধে ক্ষুদ্ধ হৈ পৰে শিলচৰবাসী । শেষত SMC হাস্পতালত উন্নত চিকিৎসা সেৱা প্রদানৰ দাবী আৰু স্বায়ন্তনৰ অকাল মৃত্যুৰ প্রতিবাদত শুকুৰবাৰে স্বাস্থ্য বিভাগ আৰু SMC হাস্পতাল কতৃপক্ষৰ বিৰুদ্ধে ৰাজ পথলৈ ওলাই আহে এই সকল প্রতিবাদী লোক ।
পুনৰ যাতে আন এজন স্বায়ন্তনক হেৰুৱাব নালাগে তাৰ বাবে শীঘ্রে SMC হাস্পতালত কাৰ্ডিওলজি,নিউৰ'লজি আৰু নেফ্রল'জি বিভাগ কেইটাত চিকিৎসক নিযুক্তিৰ দাবী জনাইছে প্রতিবাদী সকলে । তেওঁলোকে ৰাজ্যৰ স্বাস্থ্য বিভাগৰ বিৰুদ্ধে অভিযোগ কৰি কয় যে SMC হাস্পতাল কতৃপক্ষই সৌ সিদিনা ডেৰ শ বছৰীয়া বৰ্ষপূৰ্তি ধুম ধামেৰে পালন কৰিলে ৷ অথচ, চিকিৎসা মহাবিদ্যালয় হাস্পতাল খনত প্ৰয়োজনীয় সা-সুবিধা উপলদ্ধ নহয়।