ৰাইডঙীয়াত ঋতুস্ৰাৱৰ সময়ত ল'বলগীয়া স্বচ্ছতা, চেনিটেৰী নেপকিনৰ ব্যৱহাৰ আৰু নেপকিন বিতৰণৰ অনুষ্ঠান…
ডিজিটেল সংবাদ বটদ্ৰৱাঃ স্বেচ্ছাসেৱী সংগঠন প্ৰজন্মৰ উদ্যোগত নগাঁও জিলাৰ বটদ্ৰৱাৰ সমীপৱৰ্তী ৰাইডঙীয়া ফুলগুৰি গাঁৱত দেওবাৰে মহিলাৰ ঋতুস্ৰাৱৰ সময়ত ল'বলগীয়া স্বচ্ছতা, চেনিটেৰী নেপকিনৰ ব্যৱহাৰ আৰু নেপকিন বিতৰণৰ এক অনুষ্ঠান অনুষ্ঠিত হয়। অনুষ্ঠানটোত অংশগ্ৰহন কৰে অসমৰ পেডমেন খ্যাত গুৱাহাটী চিকিৎসা মহাবিদ্যালয়ৰ চিকিৎসক ডা০ কুমাৰ পিংকু প্ৰতীম, ডা০ ধনজিৎ হালৈ আৰু সাংবাদিক দিব্যজ্যোতি বৰুৱা।
অনুষ্ঠানটোত অংশগ্ৰহণ কৰি চিকিৎসকগৰাকীয়ে মহিলাৰ মাহেকীয়াৰ সময়ত ল'বলগীয়া স্বচ্ছতাৰ বিষয়ে বিষদ ভাৱে আলোকপাত কৰাৰ লগতে মাহেকীয়াৰ সময়ত সামাজিক ব্যাধিৰ বাবে মহিলাসকলে সন্মুখীন হোৱা সমস্যাসমূহৰ বিৰুদ্ধে অসমত এক বিপ্লৱৰ প্ৰয়োজন আছে বুলি মত পোষণ কৰে।
প্ৰজন্মৰ সম্পাদক শিৱ প্ৰসাদ বৰাই আঁত ধৰা অনুষ্ঠানটিত উপস্থিত থাকি গুৱাহাটী চিকিৎসা মহাবিদ্যালয়ৰ আন এগৰাকী চিকিৎসক ডা০ ধনজিৎ হালৈ আৰু সাংবাদিক দিব্যজ্যোতি বৰুৱাই "মাহেকীয়া ব্যাধি নহয়" এই সন্দৰ্ভত উপস্থিত ৰাইজক সজাগতা সৃষ্টিৰ বাবে ভাষন প্ৰদান কৰে।
প্ৰজন্মৰ সভাপতি শংকৰ জ্যোতি শৰ্মা, উপসভাপতি অবিস্মিতা বৰুৱা, সদস্য দীপজ্যোতি শইকীয়া, অনুপম ৰাজখোৱা, গৌতম কোচ, চয়নিকা ৰাজখোৱা, গাঁওবুঢ়া নিতুল কুমাৰ বৰদলৈ, শিক্ষক জয়ন্ত শইকীয়াৰ লগতে ৰাইডঙীয়া অঞ্চলৰ কেইবাগৰাকী কিশোৰী, যুৱতী, বোৱাৰীৰ উপস্থিতিত অনুষ্ঠিত অনুষ্ঠানটিৰ শেষত কবি ৰবিশংকৰ বৰদলৈৰ "ৰ'দ আৰু অনান্য কবিতা" শীৰ্ষক এখনি কবিতা পুথিও উন্মোচন কৰা হয়। উল্লেখ্য যে, ক'ভিড প্ৰটকল ৰক্ষা কৰি অনুষ্ঠিত অনুষ্ঠানটিত প্ৰজন্মৰ তৰফৰ পৰা উপস্থিত কিশোৰী, যুৱতী, বোৱাৰী সকলক চেনিটেৰী নেপকিন বিতৰন কৰা হয়।
