সাহিত্যাচাৰ্য ডঃ প্ৰমোদ চন্দ্ৰ ভট্টাচাৰ্য আৰু নাই

সাহিত্যাচাৰ্য ডঃ প্ৰমোদ চন্দ্ৰ ভট্টাচাৰ্য আৰু নাই

ডিজিটেল সংবাদ, গুৱাহাটীঃ ৰাজ্যবাসীৰ বাবে আন এক দুঃখবৰ। অসমীয়া ভাষা-সাহিত্যৰ অন্যতম গৱেষক সাহিত্যাচাৰ্য ডঃ প্ৰমোদ চন্দ্ৰ ভট্টাচাৰ্য আৰু নাই। সোমবাৰে পুৱা প্ৰায় ৪.৪৫ বজাত শেষ নিশ্বাস ত্যাগ কৰে বিশিষ্ট সাহিত্যিকগৰাকীয়ে।

বিগত কেবাদিনো ধৰি অসুস্থ হৈ থকা বিশিষ্ট সাহিত্যিতগৰাকীক যোৱা ২৪ অক্টোবৰত সংকটজনক অৱস্থাত গুৱাহাটীৰ নেমকেয়াৰ হাস্পতালত ভৰ্তি কৰোৱা হৈছিল। চিকিৎসাধীন অৱস্থাতে মৃত্যুক আকোৱালি লয় ৯৪ বৰ্ষীয় ভট্টাচাৰ্যই।

ডঃ ভট্টাচাৰ্য্য গুৱাহাটী আলোচনা চক্ৰ, কাকলি মইনা পাৰিজাত, অসম প্ৰাকৃতিক কবি সন্মিলন, চানমাৰি সাহিত্য সভাৰ দৰে বিভিন্ন অনুষ্ঠানৰ সৈতে জড়িত। ৰাজ্যখনৰ শিক্ষাৰ ক্ষেত্ৰখনতো উল্লেখনীয় অৱদান আগবঢ়াই আহিছে ভোলানাথ বৰুৱা মহাবিদ্যালয়ৰ প্ৰাক্তন অধ্যক্ষগৰাকীয়ে।

অসমীয়া থলুৱা কৃষ্টি-সংস্কৃতি তথা ভাষা-সাহিত্যলৈ অনন্য অৱদান আগবঢ়োৱা সাহিত্যাচাৰ্যগৰাকীৰ মৃত্যুৰ খবৰ বিয়পি পৰাৰ লগে লগে অসংখ্যা গুণমুগ্ধই ভিৰ কৰিছে তেওঁৰ বাসগৃহত। তেওঁৰ মৃত্যুত অসম সাহিত্য সভাকে আদি কৰি ৰাজ্যখনৰ বিভিন্ন দল-সংগঠনে গভীৰ শোক ব্যক্ত কৰিছে।
বৰ্তমান তেওঁৰ নশ্বৰদেহ নৱগিৰি নগৰস্থিত বাসগৃহত ৰখা হৈছে। পৰিয়ালৰ সূত্ৰই জনোৱা মতে দিনৰ প্ৰায় ১ বজাত সম্পন্ন কৰা হ'ব তেওঁৰ শেষকৃত্য। ৰাজ্যিক মৰ্যাদাৰে তেওঁক বিদায় জনোৱা হ'ব বুলিও জানিবলৈ দিছে পৰিয়ালৰ লোকসকলে। 

Related Stories

No stories found.
Code:
logo
Asomiya Pratidin
www.asomiyapratidin.in