ডিজিটেল সংবাদ, নলবাৰীঃ 'এটা জাতিৰ স্বকীয়তা লুকাই থাকে মাতৃভাষাৰ গৰ্ভত। মাতৃভাষাক শক্তিশালী কৰাৰ দায়িত্ব প্ৰতিগৰাকী সন্তানে লোৱা উচিত। মাতৃভাষা শক্তিশালী নহ'লে এটা জাতি শক্তিশালী হ'ব নোৱাৰে । মাতৃভাষা শক্তিশালী হ'লেহে জাতি জীয়াই থাকিব ।' – এই মন্তব্য নলবাৰী জিলা সাহিত্য সভাৰ সভাপতি ধ্ৰুৱ জ্যোতি শৰ্মাৰ । নলবাৰী জিলা সাহিত্য সভাৰ ৩৫ সংখ্যক প্ৰতিষ্ঠা দিৱস উপলক্ষে আজি পুৱা ৯ বজাত অসম সাহিত্য সভাৰ মুল পতাকা উত্তোলন কৰি জিলা সভাপতি শৰ্মাই কয় অসমীয়া ভাষা-সংস্কৃতি উন্নয়নৰ ক্ষেত্ৰত অসম সাহিত্য সভাই গঠনমুলক কাম-কাজ কৰি আহিছে । ১৯৮৭ চনত জন্ম লাভ কৰা নলবাৰী জিলা সাহিত্য সভাই জিলাখনৰ সাহিত্য তথা বৌদ্ধিক দিশত অগ্ৰণী ভুমিকা লৈ আহিছে বুলিও তেওঁ কয় ।
এই ক্ষেত্ৰত জিলা সাহিত্য সভাৰ কাৰ্যালয়ৰ গৃহ আৰু ভূমিদাতা প্ৰয়াত মহেন্দ্ৰ নাৰায়ণ চৌধুৰী , অন্যতম প্ৰতিষ্ঠাপক প্ৰয়াত অধ্যাপক হৰেন্দ্ৰ নাথ শৰ্মাৰ অৱদান বৰ্ণনা কৰি জিলা সাহিত্য সভাৰ প্ৰাক্তন সভাপতি – সম্পাদক তথা বিষয়-ববীয়া সকলৰ নাম স্মৰণ কৰে । জিলা সাহিত্য সভাৰ সভাপতি গৰাকীয়ে মূল পতাকা উত্তোলন কৰাৰ সমানেই কাৰ্যালয় চৌহদত ভাষা-জননীৰ ৩৪ খন পতাকা বিশিষ্ট ব্যক্তি সকলৰ দ্বাৰা উত্তোলন কৰা হয় ।
জিলা সাহিত্য সভাৰ সম্পাদক পংকজ বেজবৰুৱাই আঁত ধৰা অনুষ্ঠানটিত অসম সাহিত্য সভাৰ কাৰ্যনিৰ্বাহক সদস্য ডা০ বিপিন চন্দ্ৰ কলিতা , জিলা সাহিত্য সভাৰ উপ সভাপতি অতুল চন্দ্ৰ শৰ্মা , প্ৰাক্তন সভাপতি ৰমানাথ বৰুৱা , গোলোক পাঠক , প্ৰাক্তন সম্পাদক দীকপ ডেকা , লক্ষী পাটোৱাৰী , বিশিষ্ট গ্ৰন্থ প্ৰকাশক তথা জাৰ্নাল এম্পৰিয়ামৰ স্বত্বাধিকাৰী সুৰেন্দ্ৰ চন্দ্ৰ বৈশ্য , বিশিষ্ট চিত্ৰ শিল্পী অবিনাশ মজুমদাৰ ,যোগেন্দ্ৰ নাথ শীল , সাহিত্যিক বিমলা দেৱী , ডা মকিবৰ ৰহমান , বিপিন কলিতা , গোকুল ডেকা , হৰিশ চন্দ্ৰ বৈশ্য , বীৰেন্দ্ৰ নাথ শৰ্মা , ৰাজেন্দ্ৰ নাথ শৰ্মা , খনীন্দ্ৰ চন্দ্ৰ নাথ , শুক্লেশ্বৰ মেধি , চাইফ উদ্দিন আহমেদ , ডা প্ৰাণকান্ত ভট্টাচাৰ্য , পৰেশ চন্দ্ৰ বৰ্মন , ভৱেশ চন্দ্ৰ শৰ্মা , খদেজা বেগম আদিকে ধৰি ৩৪ গৰাকী সাহিত্যসেৱী তথা বিশিষ্ট নাগৰিকৰ দ্বাৰা ৩৪ খন পতাকা উত্তোলন কৰা হয় ।
ইয়াৰ পিছতেই সাহিত্যসেৱী মহেন্দ্ৰ নাৰায়ণ চৌধুৰীৰ আৱক্ষ মূৰ্ত্তিত জিলা সাহিত্য সভাৰ সহকাৰী সম্পাদক শ্বাহ আলম আহমেদ , অসম সাহিত্য অসম সাহিত্য সভাৰ প্ৰতিষ্ঠাপক সম্পাদক শৰৎ চন্দ্ৰ গোস্বামীৰ আৱক্ষ মূৰ্তিত সহকাৰী সম্পাদক নৰেশ্বৰ কলিতা আৰু গুৱাহাটী বিশ্ববিদ্যালয়ৰ অৱসৰী অধ্যাপিকা ড° উপমা বৰ্মন ডেকাই বন্তি প্ৰজ্বলনৰে শ্ৰদ্ধাঞ্জলি জ্ঞাপন কৰে । ইয়াৰ পিছতেই জিলা সাহিত্য সভাৰ সভাপতি ধ্ৰুৱজ্যোতি শৰ্মাৰ সভাপতিত্বত অনুষ্ঠিত হোৱা মুকলি সভাত সাহিত্যসেৱি আজিজুৰ ৰহমানৰ নাট্য সংকলন " নাটঘৰ " উন্মোচন কৰে বিশিষ্ট নাট্যকাৰ তিলক বৈশ্যই ।
