ডিজিটেল ডেস্কঃ আগন্তক লোকসভা নিৰ্বাচনৰ পূৰ্বে বৃহস্পতিবাৰে নাগপুৰত আয়োজিত আৰ এছ এছৰ এক অনুষ্ঠানত উপস্থিত হৈ ৰাম মন্দিৰ আৰু ভাৰতৰ সেনা শক্তিক লৈ মন্তব্য কৰে সংগঠনৰ প্ৰধান মোহন ভাগৱতে৷ আৰ এছ এছৰ প্ৰধান মোহন ভাগৱতে অনুষ্ঠানত কয়, 'ৰাম আমাৰ গৌৰৱ, গতিকে তেওঁৰ স্মৰণত স্মাৰক নিৰ্মাণ হোৱা উচিত৷ ইয়াৰ বাবে চৰকাৰে নতুন আইন প্ৰণয়ন কৰিব লাগে৷ যাতে ৰাম মন্দিৰ শীঘ্ৰে নিৰ্মাণ হয়৷'
তেওঁ পুনৰ কয়, 'অতি শীঘ্ৰেই ভাৰত বিশ্বৰ গুৰু ৰাষ্ট্ৰ হিচাপে প্ৰমাণিত হ'বলৈ গৈ আছে৷ সত্য আৰু অহিংসাৰ ৰাজনীতিৰে পূৰ্ণ ভাৰত বিশ্বৰ একমাত্ৰ দেশ৷ কিন্তু শত্ৰু সম্পৰ্কে সতৰ্ক আৰু ভাৰতৰ সেনাবাহিনী শক্তিশালী হোৱাটোও প্ৰয়োজন৷ আমি কাৰো সতে শত্ৰুতা কৰাৰ প্ৰয়োজন নাই৷ কিন্তু কোনেও যাতে আমাক আক্ৰমণ কৰিব নোৱাৰে তাৰ বাবে আমি শক্তিশালী হ'ব লাগিব৷ নিজৰ নিৰাপত্তাৰ বাবে কাৰো ওপৰত ভৰষা কৰি লাভ নাই৷'
আনহাতে নাগপুৰত পাকিস্তানক আক্ৰমণ কৰি আৰএছএছ প্ৰধান মোহন ভাগৱতে কয়, 'প্ৰতিৱেশী ৰাষ্ট্ৰৰ চৰকাৰ সলনি হ'লেও মনোভাৱ সলনি হোৱা নাই৷ ভাৰতে গুলীৰ উত্তৰ গুলী বৰ্ষণেৰে দিব পাৰে৷' ইফালে, ভাগৱতে দেশৰ ভিতৰতে কোনো কোনো লোকে সংঘাত সৃষ্টি কৰাৰ বাবে চেষ্টা চলাইছে বুলি অভিযোগ উত্থাপন কৰি তাৰ বিৰুদ্ধে জংগী আন্দোলন গঢ়ি তোলা প্ৰয়োজন বুলিও মন্তব্য কৰে৷