ডিজিটেল সংবাদ, চৰাইদেউঃ প্ৰধানমন্ত্ৰী নৰেন্দ্ৰ মোডীৰ নিৰ্দেশত সমগ্ৰ দেশত ২১ দিন লকডাউন ঘোষণা কৰা হৈছে। এই সময়চোৱাত চৰাইদেউ জিলাৰ সকলো পাইকাৰী গেলামালৰ দোকানীয়ে পুৱা ৮ বজাৰ পৰা আবেলি ১ বজালৈকে আৰু খুচুৰা গেলামালৰ দোকানবোৰ পুৱা ১০ বজাৰ পৰা বিয়লি ৩ বজালৈ ৰাইজৰ অত্যাৱশ্যকীয় সামগ্ৰীসমূহ ক্ৰয় কৰাৰ কাৰণে খোলা হ'ব বুলি জানিবলৈ দিছে৷
এই ক্ষেত্ৰত দোকানীসকলে লগতে গ্ৰাহকসকলে জিলা প্ৰশাসনৰ কিছুমান আদেশ মানি চলিব লাগিব বুলি উল্লেখ কৰিছে৷ একে সময়তে ৫ জনতকৈ অধিক লোক গেলামালৰ দোকানত গোট খাব নোৱাৰিব, দোকানীৰ লগত আৰু গ্ৰাহকসকলে নিজৰ মাজত ১ মিটাৰ দূৰত্ব বজাই ৰাখিব লাগিব, হাত ধোৱাৰ বাবে দোকানীসকলে দোকানৰ সন্মুখত চাবোন আৰু পানীৰ ব্যৱস্থা কৰি দিব লাগিব, দোকানীজনে দোকানখন চাফ চিকুনকৈ ৰাখিব লাগিব প্ৰকাশ কৰা হৈছে৷ এই আদেশ অমান্য কৰা সকলৰ বিৰুদ্ধে ১৮৮ ধাৰাৰ অধীনত বিহিত ব্যৱস্থা গ্ৰহণ কৰা হ'ব৷