ডিজিটেল সংবাদ, লালুকঃ লালুক থানাৰ অন্তৰ্গত তৰাজুলি সোনোৱাল গাঁৱৰ মাজেৰে যোৱা ৰে'ল পথৰ চিৰিৰ নিচেই কাষতে এগৰাকী মহিলাৰ মৃতদেহ শুকুৰবাৰে পুৱা উদ্ধাৰ হয়৷ ৰে'ল পথৰ কাষৰ পথাৰত গৰু এৰাল দিবলৈ যোৱা এজনলোকে মৃতদেহটো প্ৰত্যক্ষ কৰি লালুক থানাত খবৰ দিয়ে৷
ঘটনাস্থলীত লালুক থানাৰ অ' চি প্ৰণৱ বৰা উপস্থিত হৈ ৰেলপথৰ কাষতে হোৱাৰ পৰিপেক্ষিতত ৰে'ল আৰক্ষীক খবৰ দিয়ে৷ উত্তৰ লখিমপুৰৰ পৰা অহা ৰে'ল আৰক্ষীয়ে লালুক আৰক্ষীৰ সহযোগত মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে৷
আনহাতে উদ্ধাৰ হোৱা মৃতদেহটো বাৰমাইল পুখুৰীয়াৰ নবীন শইকীয়াৰ পত্নী গীতা শইকীয়া(৩৪) বুলি চিনাক্ত হয়৷ জানিবপৰা মতে, দুটাকৈ সন্তানৰ মাতৃ গীতা শইকীয়া বিগত সাত বছৰ ধৰি মানসিক বিকাৰগ্ৰস্ত হৈ ঘূৰি ফুৰিছিল৷
যোৱা কিছুদিন লালুক গড়মূৰৰ মাতৃ গৃহত আশ্ৰয় লোৱা গীতাই নিতৌ ৰাতিপুৱা প্ৰাতঃভ্ৰমণৰ বাবে ৰে'ল পথৰ কাষেৰে গৈছিল৷ শুকুৰবাৰে পুৱাও তেনেদৰেই ঘৰৰ পৰা ওলাই অহাৰ সময়তে ৰে'লে খুন্দিয়াই থৈ যোৱাৰ সন্দেহ প্ৰকাশ কৰিছে আৰক্ষীয়ে৷ ৰেলৰ খুন্দাৰ বাবেই মহিলা গৰাকীৰ মৃত্যু ঘটে৷
