ডিজিটেল সংবাদ শিমলুগুৰিঃ লখিমপুৰ জিলাৰ শিমলুগুৰি আৰক্ষী চকীৰ অন্তৰ্গত বহুপথাৰ গাঁৱত পুখুৰীত গা ধূই থকা অৱস্থাত অকস্মাতে এগৰাকী কিশোৰীৰ সলিল সমাধি ঘটে ৷কিশোৰীগৰাকী নাৰায়ণপুৰ মেৰমুখৰ গোহাঁইপুখুৰীৰ প্ৰশান্ত বৰুৱাৰ ১৪ বছৰীয়া কণ্যা সোণমনি বৰুৱা ৷
জানিব পৰা মতে, শিমলুগুৰিৰ বহুপথাৰৰ পেহাক ইন্দ্ৰেশ্বৰ বৰবৰুৱাৰ গৃহত ফুৰিব আহিছিল কিশোৰীগৰাকী ৷ সোমবাৰে পেহীয়েকৰ-পেহাকৰ ঘৰত ভূঁই ৰোৱাৰ পিছত এটি পুখুৰীত বিয়লি প্ৰায় চাৰি বজাত পেহীয়েকৰ জীয়েকৰ লগত গা ধূই আছিল ৷ কিন্তু অতি দুখৰ বিষয় গা-ধূই থকা অৱস্থাত ভনীয়েক হঠাৎ দ-ফালে গুচি যোৱাত বচাবলৈ যাওঁতে নিজে পানীত সোমায় পৰে ৷
ইয়াৰ পিছত কিশোৰীগৰাকীক পাৰলৈ আনি তাৎক্ষনিকভাবে ধলপুৰ খণ্ড প্ৰাথমিক আৰু সামূহিক স্বাস্থ্য কেন্দ্ৰলৈ চিকিৎসাৰ বাবে নিয়ে যদিও চিকিৎসকে লখিমপুৰ অসামৰিক চিকিৎসালয়লৈ প্ৰেৰণ কৰে ৷ কিন্তু অতি পৰিতাপৰ বিষয় উল্লেখিত চিকিৎসালয়ত গৈ পোৱাৰ পিছতেই চিকিৎসকে কিশোৰীগৰাকীক মৃত বুলি ঘোষণা কৰে ৷
