ডিজিটেল সংবাদ, কুৰুৱাবাহীঃ ভুৱা জবকাৰ্ডৰে লক্ষাধিক টকাৰ লুণ্ঠন চলোৱা বোকাখাতৰ কুৰুৱাবাহী গাঁও পঞ্চায়তৰ সচিব পৰেশ গন্ধীয়াৰ বিৰুদ্ধে বৃহস্পতিবাৰে মুকলিকৈ ওলাই আহিল অঞ্চলটোৰ ৰাইজ৷ অসমীয়া প্ৰতিদিনত পঞ্চায়তখনৰ জবকাৰ্ডৰ কেলেংকাৰীৰ বাতৰি সবিস্তাৰে প্ৰকাশ পোৱাৰ পাছতে অঞ্চলটোৰ শতাধিক পুৰুষ-মহিলা পঞ্চায়তখনৰ ৫নং আৰু ৬নং ৱাৰ্ডৰ মাজেদি যোৱা পথত অৱস্থান গ্ৰহণ কৰে৷
অঞ্চলটোৰ ৰাইজে কয় যে- আজি কাকতত বাতৰিটো প্ৰকাশ পোৱাৰ পাছতে ৰাইজ অৱগত হয় যে এদিনো কাম নকৰাকৈ বহুগৰাকী পঞ্চায়ত সদস্যই জবকাৰ্ডৰ ধন লাভ কৰিছে৷ ইয়াৰ বিপৰীতে অঞ্চলটোৰ বহুকেইগৰাকী পুৰুষ-মহিলাই যোৱা জানুৱাৰী-ফ্ৰেব্ৰুৱাৰী মাহতেই কাম কৰিছে যদিও আজি পৰ্যন্ত এপইচাও লাভ কৰা নাই৷ আনকি, জবকাৰ্ডসমূহ পঞ্চায়তৰ তৰফৰ পৰা জমা ৰখাৰ পাছতো কোনো পঞ্জীয়ন কৰা নাই৷
এনে বিভিন্ন বেমেজালিৰ বিপৰীতে কুৰুৱাবাহী গাঁও পঞ্চায়তৰ ৯ নং ৱাৰ্ডৰ সদস্যা ৰুক্মিণী চাহু, ১০ নং ৱাৰ্ডৰ সদস্য অজিত দাস, ৭নং ৱাৰ্ডৰ সদস্য নাৰায়ণ দাস আৰু ৩নং ৱাৰ্ডৰ সদস্য ৰশ্মি বৰাই এদিনো কাম নকৰাকৈ নিজৰ বেংক একাউণ্টত সুমুৱাইছে জবকাৰ্ডৰ ধন৷ আনকি, এই পঞ্চায়ত সদস্যসকলৰ একাংশই ২০১৯ বৰ্ষৰ ১ এপ্ৰিলৰ ২৮ মে' পৰ্যন্ত মুঠ ৯২ দিনৰ কাম কৰিছে বুলি দেখুওৱা হৈছে৷ কিন্তু, প্ৰকৃত জবকাৰ্ডৰ বহুগৰাকী হিতাধিকাৰীক বঞ্চিত কৰি এদিনো কাম নকৰাকৈ এই ৱাৰ্ড সদস্য গৰাকীয়ে জবকাৰ্ডৰ ধন লাভ কৰাৰ ৰাইজ ক্ষোভিত হৈ পৰে৷
ৰাইজে জনোৱা অনুসৰি, জবকাৰ্ডৰ অধীনত কোনে কিমান দিন কাম কৰিছে, সেয়া চোৱাচিতা কৰে পঞ্চায়তৰ সচিবে৷ সেইমতে, জবকাৰ্ডৰ পঞ্জীয়ন, উপস্থিতিৰ সংখ্যা আদি সকলো কম্পিউটাৰ সহায়কে যুগুত কৰি দিয়াৰ পাছত সেয়া পঞ্চায়তৰ সভাপতি-সচিবৰ দ্বাৰা পৰীক্ষা কৰা হয়৷ সেইমতেই জবকাৰ্ডৰ গৰাকীয়ে কাম কৰাৰ বিনিময়ত ধন লাভ কৰে৷ কিন্তু, আশ্চৰ্যজনকভাৱে এদিনো কাম নকৰাকৈয়ে উক্ত চাৰিগৰাকী ৱাৰ্ড সদস্যই জবকাৰ্ডৰ ধন কেনেকৈ লাভ কৰিছে বুলি প্ৰশ্ন তুলিছে৷
ইফালে, ৰাইজে কয় যে পঞ্চায়তখনত জবকাৰ্ডৰ নামত ভয়াবহ দুৰ্নীতি সংঘটিত হৈছে৷ কেৱল কেইগৰাকীমান সদস্যই নহয়, বহু জবকাৰ্ড ভুৱাকৈ দেখুৱাই চৰকাৰী ধন আত্মসাৎ কৰিছে পঞ্চায়তৰ সচিবগৰাকীয়ে৷ আনহাতে, জীপাল কৃষক-শ্ৰমিক সংঘৰ একাংশ সদস্য প্ৰতিবাদথলীত উপস্থিত হৈ পঞ্চায়ত সচিব পৰেশ গন্ধীয়া নামৰ চৰকাৰী চোৰৰ দ্বাৰা সংঘটিত হোৱা ভয়াবহ লুণ্ঠনৰ উচিত বিচাৰৰ দাবী জনায়৷
সংগঠনটোৰ উপদেষ্টা মণ্টু বৰা আৰু এগৰাকী কৰ্মকৰ্তা তিলক দাসে কয় যে- দীৰ্ঘদিন ধৰি কুৰুৱাবাহী গাঁও পঞ্চায়তত ভয়াবহ কেলেংকাৰী সংঘটিত হৈ আহিছে৷ এইক্ষেত্ৰত মাত মাতিব গ'লেই পঞ্চায়তৰ সভাপতি-সচিবে অভব্য আচৰণ কৰে৷ আনহাতে, দুখীয়া ৰাইজৰ পেটৰ ভাত কাঢ়ি খাইছে পঞ্চায়তৰ সচিব পৰেশ গন্ধীয়াৰ লগ হৈ সভাপতি ৰূপা বৰাই৷
বিগত কেইবা বছৰৰ লগতে শেহতীয়াকৈ ২০১৭-১৮, ২০১৮-১৯ বিত্তীয় বৰ্ষৰ পৰাই পঞ্চায়তখনত বিভিন্ন লুণ্ঠন চলি আছে যদিও এইক্ষেত্ৰত গোলাঘাট পশ্চিম উন্নয়ন খণ্ড, বোকাখাতৰ পূৰ্বৰ বিষয়াসকলৰ দৰেই বৰ্তমানৰ খণ্ড উন্নয়ন বিষয়া দিলীপ চৰকাৰৰ ভূমিকা ৰহস্যজনক বুলিও সংগঠনটোৱে অভিযোগ কৰে৷ আনহাতে, সম্প্ৰতি চৰকাৰী চোৰৰ ঘাটিত পৰিণত হোৱা কুৰুৱাবাহী গাঁও পঞ্চায়তৰ সভাপতি-সচিবৰ বিৰুদ্ধে বোকাখাতৰ মহকুমাধিপতিক ব্যৱস্থা গ্ৰহণৰ বাবে আহ্বান জনাইছে সংগঠনটোৱে৷