ডিজিটেল সংবাদ, ধূপধৰাঃ ধূপধৰা ক্ৰীড়া সন্থাৰ উদ্যোগত বুধবাৰৰ পৰা অনুষ্ঠিত হৈছে সপ্তম কেশৱ চন্দ্ৰ বসাক সোঁৱৰণি ক্ৰিকেট প্ৰতিযোগিতাখন৷ অসম ক্ৰিকেট সন্থাৰ দ্বাৰা অনুমোদিত তথা অসমৰ এখন অন্যতম আগশাৰীৰ ক্ৰিকেট প্ৰতিযোগিতা হিচাপে পৰিচিত প্ৰতিযোগিতাখনৰ উদ্বোধনী খেলখনত বুধবাৰে ধূপধৰা ক্ৰিকেট কোচিং চেন্টাৰে ধূপধৰা এভাগ্ৰীণ ক্লাৱক ৭৩ ৰাণত পৰাস্ত কৰে ৷
খেলখনত কোচিং চেন্টাৰে প্ৰথমে বেটিং কৰি নিৰ্ধাৰিত পঁচিশ অভাৰত প্ৰিন্স আহমেদৰ ৫৪ ৰাণৰ সহায়ত ১৮১ ৰাণ কৰে ৷ প্ৰত্যুত্তৰত এভাৰগ্ৰীণে ১৮.৪ অভাৰত আটাইকেইটা উইকেট হেৰুৱাই ১০৯ ৰাণহে কৰিবলৈ সক্ষম হয় ৷ দলৰ হৈ অধিনায়ক ইনামূল আহমেদে সৰ্বাধিক ৩৫ ৰাণ কৰে ৷
ইফালে, সূদীৰ্ঘ বাইশটা বছৰ বিৰতিৰ মূৰত অনুষ্ঠিত প্ৰতিযোগিতাখনৰ উদ্বোধনী কাৰ্যসূচী হিচাপে পুৱা পতাকা উত্তোলন কৰে ধূপধৰা ক্ৰীড়া সন্থাৰ সভাপতি মস্তাক গণিয়ে ৷ ইয়াৰ পিচতে অনুষ্ঠিত শ্ৰদ্ধাঞ্জলি অনুষ্ঠানত শ্ৰদ্ধা জ্ঞাপন কৰে ধূপধৰা তিনিদলীয়া ৰাইজৰ সভাপতি সুনীল ৰাভাই ৷
আনহাতে, গছপুলি ৰোপন কাৰ্যসূচীৰ পিচতে খেল উদ্বোধন কৰে বিকালী মহাবিদ্যালয়ৰ অধ্যক্ষ ড° মনোজ গগৈয়ে ৷ উল্লেখযোগ্য যে, শেষবাৰৰ বাবে প্ৰতিযোগিতাখন অনুষ্ঠিত হৈছিল ১৯৯৯ চনৰ ফেব্ৰুৱাৰী মাহত ৷ এইবেলি গুৱাহাটীকে ধৰি অসমৰ ভিন্ন প্ৰান্তৰ সৰ্বাধিক ষোল্লটা আগশাৰীৰ দলে অংশগ্ৰহণ কৰিবলগীয়া প্ৰতিযোগিতাখনৰ খেলসমুহ ত্ৰিশ অভাৰকৈ অনুষ্ঠিত হ'ব ৷
