ডিজিটেল সংবাদ গৰৈমাৰীঃ কামৰূপ জিলাৰ জোৰশিমুলী আৰক্ষী চকীৰ অন্তৰ্গত আচলপাৰা বজাৰৰ পৰা আৰক্ষীয়ে শুকুৰবাৰে বিয়লি অভিযান চলাই নগদ ধনসহ তীৰখেলৰ বুকী দুটাক আটক কৰিবলৈ সক্ষম হয়৷ জানিব পৰামতে ছয়গাঁও থানাৰ ভাৰপ্ৰাপ্ত আৰক্ষী বিষয়া কপিল পাঠকৰ এক গোপন খবৰৰ ভিত্তিত আৰু নিৰ্দেশত জোৰশিমুুলী আৰক্ষী চকীৰ ভাৰপ্ৰাপ্ত বিষয়া নৱজিৎ ডেকাই বিয়লি আচলপাৰাত অভিযান চলায়৷
আৰক্ষীৰ অভিযানত আচলপাৰাৰ হাইদৰ আলী, বৰাখাটৰ মোশ্বাৰফ হুছেইনক হাতে-লোটে ধৰা পেলোৱাৰ লগতে দুয়োৰে পৰা এটা মোবাইল হেণ্ডছেট, কিছু নগদ ধন আৰু তীৰখেলত ব্যৱহৃত সা-সামগ্ৰী উদ্ধাৰ কৰিবলৈ সক্ষম হয়৷ ধৃত তীৰৰ বুকী দুটাক ছয়গাঁও থানালৈ নি জেৰা চলাই থকা বুলি জানিব পৰা গৈছে৷