ডিজিটেল সংবাদ, ইটানগৰঃ ইটানগৰৰ আকস্মিক বানত কালি সন্ধানহীন হোৱা ছয়জন ব্যক্তিৰ তিনিজনৰ মৃতদেই উদ্ধাৰ হয় যদিও আন তিনিজনৰ সন্ধান অদ্যপি অব্যাহত আছে৷ পাপ্পু নাল্লা নামৰ সৰু জুৰি এটাত হঠাতে হোৱা বানত মুঠ ১৭টা বাসগৃহ পানীত উটি গৈছিল। পানীৰ ঢলে উটুৱাই নিয়া ঘৰ কেইটাৰ ভিতৰত আছিল ৬জনকৈ লোক।
একেটা পৰিয়ালৰ দুটি শিশু-কিশোৰ আৰু এগৰাকী মহিলা উটি গৈছিল আৰু তাৰে এটি শিশুৰ মৃতদেহ শুকুৰবাৰে উদ্ধাৰ হৈছিল৷ ৩৫ বছৰীয়া মহিলাগৰাকী, ১৫ বছৰীয়া যুৱতি এগৰাকী আৰু আন এজন পুৰুষৰ সন্ধান বৰ্তমানলৈ পোৱা হোৱা নাই৷ সন্ধানহীন ব্যক্তি ৩জনৰ সন্ধানত এন ডি আৰ এফে আজি পুৱাৰ পৰাই অভিযান আৰম্ভ কৰিছে৷
আৰক্ষীয়েও পৃথকে পৃথকে অভিযান আৰম্ভ কৰিছে বুলি ইটানগৰৰ আৰক্ষী অধীক্ষক এম হৰ্ষবৰ্ধনে জানিবলৈ দিছে৷ উল্লেখ্য যে, বৃহস্পতিবাৰৰ মাজনিশা ইটানগৰৰ ডাৰিয়া পাহাৰ অঞ্চলত ডাৱৰ বিস্ফোৰণ হৈছিল আৰু পাপ্পু নাল্লাৰ লগতে চেংকি নদীত হঠাতে জলস্তৰ বৃদ্ধি পাইছিল৷
পাপ্পু নাল্লা আৰু চেংকি নদী দুখন গৈ ডিক্ৰঙত পৰিছেগৈ আৰু শুকুৰবাৰে আবেলি নদীত উটি যোৱা এজন ব্যক্তিৰ মৃতদেহ নিৰজুলিৰ ওচৰৰ ডিক্ৰং নদীৰ দলঙৰ ওচৰৰ পৰা উদ্ধাৰ কৰা হৈছিল৷ নিৰজুলিৰ পৰা অসম সীমান্তলৈ মাত্ৰ ১০ কিলোমিটাৰ৷ সেয়ে সন্ধানহীন লোক কেইজনৰ মৃতদেহ অসমলৈ উটি যাব পাৰে বুলি সন্দেহ কৰা হৈছে৷
