ডিজিটেল সংবাদ, কোকৰাঝাৰঃ বিটিচি পৰিষদীয় নিৰ্বাচনলৈ মাজতে এমাহ বাকী থকা অৱস্থাত বিটিচি প্ৰধান হাগ্ৰামা মহিলাৰীৰ পত্নীৰ গাড়ীত দুৰ্বৃত্তই শিলগুটি দি আক্ৰমণ কৰা ঘটনাই চাঞ্চল্যৰ সৃষ্টি কৰিছে৷ বৃহস্পতিবাৰে ভাৰত-ভূটান সীমান্তৰৰ উল্টাপানী শিৱ মন্দিৰত হাগ্ৰামা মহিলাৰীৰ পত্নী ছিউলি মহিলাৰীয়ে পূজা কৰি অহাৰ সময়তে সন্ধিয়া বাটতে দুৰ্বৃত্তই শিলগুটিৰে আক্ৰমণ কৰে।
এএছ-১৬-ই-০০০৯ নম্বৰৰ লেণ্ড ক্ৰুইজাৰ ভি এক্স ভি ৮ গাড়ীখনত সন্ধিয়াৰ ভাগত ৰাজপথৰ নিৰ্জম ঠাইত দুৰ্বৃত্তই শিলগুটিৰে আক্ৰমণ কৰাত গাড়ীখনৰ আগফালৰ আইনাৰ অলপ ক্ষতি হয় যদিও গাড়ীখনত থকা হাগ্ৰামা মহিলাৰীৰ পত্নী ছিউলি মহিলাৰী, দুই পুত্ৰ ক্ৰমে- জান মহিলাৰী (৮) আৰু জিউ মহিলাৰী (৮) ৰক্ষা পৰে।
গাড়ীখনৰ চালক গেমনা মহিলাৰীয়ে জনোৱা মতে, সন্ধিয়া ৫-৩০ বজাত উল্টাপানী শিৱ মন্দিৰৰ পৰা ৭/৮ কিলোমিটাৰ পথ অতিক্ৰম কৰা অহাৰ সময়ত ১৫/১৬ জনীয়া দুৰ্বৃত্তৰ দল এটাই অতৰ্কিতে গাড়ীখনত আক্ৰমণ চলায়৷ সেই সময়ত গাড়ীখনৰ গতিবেগ ৫০/৬০ কিলোমিটাৰ আছিল৷
এই ঘটনাই কোকৰাঝাৰৰ লগতে সমগ্ৰ বিটিচি অঞ্চলত চাঞ্চল্যৰ সৃষ্টি কৰিছে৷ উক্ত ঘটনাৰ আঁৰত বিপিএফৰ নেতা ৰতনলাল বসুমতাৰীয়ে বিৰোধীপক্ষ জড়িত আছে বুলি দাবী কৰিছে। ইতিমধ্যে আইজি অনুৰাগ আগৰৱাল আৰু আৰক্ষী অধীক্ষক ৰাজেন সিঙে পৰিস্থিতৰ বুজ লৈছে।
