ডিজিটেল সংবাদ, ধূপধৰাঃ অসম ফুটবল সন্থাৰ ২৩ সংখ্যক আন্তঃ জিলা ছিনিয়ৰ মহিলা ফুটবল প্ৰতিযোগিতাখন মঙলবাৰৰ পৰা গোৱালপাৰা জিলাৰ ধূপধৰাত আৰম্ভ হৈছে৷ গোৱালপাৰা জিলা ক্ৰীড়া সন্থাৰ উদ্যোগত তথা ধূপধৰাৰ বিকালী ক্ৰীড়া সন্থাৰ সহযোগত অনুষ্ঠিত গোবিন্দ ৰাম মৌৰ আৰু বাণাৰসী দেৱী সোঁৱৰণী ট্ৰফী ২০১৯-২০ প্ৰতিযোগিতাখনৰ উদ্বোধনী খেলখনত গোৱালপাৰা জিলা মহিলা দলে ভেৰগাঁও মহিলা ফুটবল দলক ৪-২ গ'লত পৰাস্ত কৰে।
প্ৰথমাৰ্ধৰ ৯ মিনিটতে ভেৰগাঁও দলে প্ৰথমটো গ'ল দি অগ্ৰগতি লাভ কৰে যদিও ২২ মিনিটত দলটোৰ খেলুৱৈয়ে এটা আত্মঘাতী গ'ল দিয়ে আৰু স্ক'ৰ ১-১ গ'লত ড্ৰ হয়৷ ইয়াৰ মাত্ৰ দুই মিনিট পিচতে গোৱালপাৰা দলৰ হৈ চালবিনা চাংমাই এটা গ'ল দিয়াৰ ফলত গোৱালপাৰা দলে ২-১ গ'লত অগ্ৰগতি লাভ কৰে৷
দ্বিতীয়াৰ্ধত অৰ্থাৎ খেলৰ ৪৩ মিনিটত পুনৰ ভেৰগাঁও দলৰ জোনাকী বড়োয়ে এটা গ'ল দি খেলখনত ২-২ গ'লত সমতা স্থাপন কৰে৷ ইয়াৰ পিচতে অৱশ্যে গোৱালপাৰা দলে আক্ৰমণাত্মকভাৱে খেলি ক্ৰমে ৫৩ আৰু ৭৫ মিনিটত গোৱালপাৰা দলৰ ফ'ৰৱাৰ্ড প্ৰাইচি জি মোমিনে দুটাকৈ গ'ল দি খেলখনত ৪-২ গ'লৰ ব্যৱধানত জয়লাভ কৰে৷ ইয়াৰ পূৰ্বে প্ৰতিযোগিতাখন আনুষ্ঠানিকভাৱে উদ্বোধন কৰে গোৱালপাৰা জিলাৰ উপায়ুক্ত বৰ্ণালী ডেকাই৷
প্ৰতিযোগিতাখন আৰম্ভ হোৱাৰ পূৰ্বে অসম ফুটবল সন্থাৰ পতাকা উত্তোলন কৰে গোৱালপাৰা জিলা ক্ৰীড়া সন্থাৰ সভাপতি জিতেন দাসে৷ আনহাতে গোৱালপাৰা জিলা ক্ৰীড়া সন্থা আৰু বিকালী ক্ৰীড়া সন্থাৰ পতাকা উত্তোলন কৰে ক্ৰমে অসম ফুটবল সন্থাৰ মেচ কমিছনাৰ তাজমহল হুছেইন আৰু বিকালী ক্ৰীড়া সন্থাৰ সভাপতি ড° আব্দুল হক আহমেদে৷ উদ্বোধনী অনুষ্ঠানত অসম ফুটবল সন্থাৰ লগতে গোৱালপাৰা জিলা ক্ৰীড়া সন্থাৰ কেবাগৰাকী বিষয়ববীয়া উপস্থিত থাকে৷