ডিজিটেল সংবাদ ,ধেমাজিঃ ধেমাজিৰ ক'ভিড আক্ৰান্ত লোকসকলৰ শাৰীৰিক আৰু মানসিকভাৱে সুস্থ আৰু সবল কৰি তোলাৰ উদ্দেশ্য ধেমাজি জিলাৰ প্ৰশাসনৰ উদ্যোগত তেলিজানস্হিত আন্তঃ জিলা বাছ আস্হানত থকা ক'ভিড কেন্দ্ৰত শুকুৰবাৰে পুৱা ৭ বজাৰ পৰা ৮ বজাৰলৈকে প্ৰায় এক ঘন্টা ধৰি এটি যোগ প্ৰশিক্ষণ শিৱৰৰ শুভাৰম্ভণি কৰে ধেমাজি জিলা স্বাস্থ্য বিভাগৰ যুটীয়া সঞ্চালক ডাঃ উদ্য়ন ৱৰুৱাই ৷
শুভাৰম্ভণি অনুষ্ঠানত ডাঃ বৰুৱাই বক্তব্যত অতীজৰ পৰাই ৰ্ঋষি মুনিসকলে শাৰীৰিক আৰু মানসিকভাৱে সুস্থ সবল হৈ থাকিবলৈ যোগ আৰু প্ৰানায়ম কৰি আহিছে বুলি উল্লেখ কৰে ৷ বক্তব্যত তেওঁ যোগ আৰু সাধনাৰ জৰিয়তে পাব পৰা বিভিন্ন উপকাৰিতা বিষয়ে ভাষনত বিষদভাৱে উল্লেখ কৰে ৷
যোগ প্ৰশিক্ষণ শিৱিৰত উপস্থিত থকা ধেমাজি জিলা উপায়ুক্ত পি . বিজয় ভাস্কৰ ৰেড্ডীয়ে বক্তব্যত কয় যে জিলা প্ৰশাসন আৰু স্বাস্থ্য বিভাগে ক'ভিড – ১৯ মহামাৰীক পৰাজিত কৰিবলৈ বিভিন্ন ধৰনৰ কাৰ্য্যসূচী হাতত লোৱা হৈছে জানিবলৈ দিয়ে ৷ উপায়ুক্ত গৰাকীয়ে ভাষন প্ৰসংগত ক'ভিড আক্ৰান্ত লোকসকলে যাতে যোগ প্ৰানায়মৰ জৰিয়তে সোনকালে আৰোগ্য লাভ কৰিব পাৰে তাৰ বাবে এই যোগ প্ৰশিক্ষণ কাৰ্য্যসূচী শিৱিৰ লোৱা হৈছে কয় ৷
ধেমাজি জিলা ৰাষ্ট্ৰীয় স্বাস্থ্য অভিযানৰ প্ৰচাৰ মাধ্যমৰ বিষয়া ড° অচ্যুত গগৈয়ে আঁত ধৰা প্ৰশিক্ষণ শিৱিৰটিত ধেমাজিৰ আৰোগ্য যোগ প্ৰশিক্ষণ কেন্দ্ৰৰ পৰিচালক পুলেন দাসৰ দ্বাৰা যোগ প্ৰশিক্ষণ দিয়া হয় ৷উল্লেখযোগ্য যে শুকুবাৰে অনুষ্ঠিত হোৱা যোগ প্ৰশিক্ষণটিত মঠ ৭৬ গৰাকী ক'ভিড আক্ৰান্ত ৰোগীয়ে অংশ লয় ৷
