ডিজিটেল ডেস্কঃ হেঁপাহৰ ভোগালীক আদৰি ৰাজ্যবাসীয়ে উৰুকাৰ নিশা লগে ভাগে এসাজ খাই আনন্দ ফূৰ্তিত মতলীয়া হৈছে। যি সময়ত সকলোৱে ভোগালীৰ ভোগ আৰু সুখ লয়, সেই সময়ত আৰক্ষীৰ লোক সকলে পৰিয়াল-স্বজনৰ পৰা আঁতৰত থাকি দায়িত্ব পালন কৰিব লগা হয়।
আৰক্ষীৰো থাকে নিজা এখন পৃথিৱী, থাকে ঘৰ-সংসাৰ। ব্যস্ততাৰ মাজতেই তেওঁলোকেও উদযাপন কৰিব পাৰে এনে উৎসৱ। ঢকুৱাখানাত মাঘৰ বিহুৰ দিনা দেখা পোৱা গ'ল ব্যতিক্ৰম দৃশ্য। ঢকুৱাখানা থানাৰ আৰক্ষীৰ বিষয়াসকলে লগ হৈ থানাৰ চৌহদতে আয়োজন কৰিলে ভোগালীৰ ভোজ-ভাত।
নঁৰা আনি চৌহদৰ মাজতে সাজিলে ভেলাঘৰ। কৰ্তব্যৰ সমান্তৰালভাৱে চলিল উৰুকাৰ ভোজ-ভাতৰ আয়োজন। আৰু পুৱা পৰম্পৰা অনুসৰি থানাৰ চৌহদতে সজা মেজিৰ জুইৰ উত্তাপ ল'লে আৰক্ষীয়ে। থানাত কৰ্মৰত এজন কনিষ্ঠবলে জানিবলৈ দিয়া মতে, থানাখনৰ লোকসকলৰ লগতে দুই এক অতিথিও আহিল এই ভোজ-ভাতলৈ।
ব্যস্ততাৰ মাজতো আৰক্ষীয়ে এনে পৰম্পৰাৰে মেজি আৰু ভেলাঘৰৰ পৰিৱেশৰ মাজত নিজকে কিছু হ'লেও সজীৱ কৰিলে। উল্লেখযোগ্য যে, অসম আৰক্ষীত কৰ্মৰত লোকসকলৰ এনে কিছু ব্যতিক্ৰমী চিন্তা-চৰ্চাই তেওঁলোকৰ মানসিক চাঁপৰ মাজত থকাৰ পৰা কিছু হ'লেও মুক্ত হোৱাৰ অৱকাশ দিব।
শিৱসাগৰ থানাতো আৰক্ষীয়ে মেজিৰ ভোজ-ভাত আয়োজন কৰে। যি সময়ত আৰক্ষী উৎসৱৰ সময়বোৰ নিজৰ বাবে অলপ সময় উলিয়াবলৈ সক্ষম নহয়, সেই সময়ত আৰক্ষীৰ মাজলৈ অহা স্বতস্ফূৰ্ত এই পৰিৱৰ্তনে এক ইতিবাচক বাৰ্তা প্ৰেৰণ কৰিছে।