ডিজিটেল সংবাদ, মাজুলীঃ সত্ৰ সমূহৰ অন্যতম মূল উৎসৱ ফল্গু উৎসৱ। সত্ৰপীঠ
মাজুলীৰ সত্ৰসমূহত ৩ দিনীয়াকৈ শ্ৰীশ্রীকৃষ্ণৰ দৌলযাত্ৰা মহোৎসৱ পালন কৰা হয় । মুখাশিল্পৰ বাবে বিখ্যাত নতুন চামগুৰি সত্ৰত অধিবাসেৰে মহোৎসৱৰ আৰম্ভ হয় । সত্ৰখনৰ ভকত-বৈষ্ণৱসকলে গায়ন-বায়ন, নাম-প্ৰসংগ কৰি নামঘৰৰ পৰা গোঁসাই উলিয়াই দৌলঘৰত দৌলগোবিন্দক প্ৰতিষ্ঠা কৰে।
অধিবাস কাৰ্যসূচী আৰম্ভ হোৱা দৌল উৎসৱত বৰ্ণাঢ্য কাৰ্যসূচী ৰূপায়ন কৰে। সোমবাৰে প্ৰাতঃকীৰ্ত্তন, আইসকলৰ নাম, খোল প্ৰসংগ, নাম-কীৰ্ত্তন আৰু দুপৰীয়া সত্ৰীয়া পৰম্পৰা অনুসৰি হোলীগীত , বৰগীত আৰম্ভ কৰা এই ফল্গু উৎসৱ দিনোৱা কাৰ্যসূচী চলিব ।
উৎসৱত আমন্ত্ৰিত অতিথিৰ দ্বাৰা সাংস্কৃতিক অনুস্থান পৰিবেশন কৰা হয় ৷ ইয়াৰ পাছতে ফুৰনি পালন কৰা হয়। সকলো ভকত-বৈষ্ণৱে দৌলগোবিন্দক লৈ ফাকু চতিয়াই উলহ-মালহেৰে পালন কৰে ।
মাজুলীৰ ঐতিহাসিক গড়মূৰ সত্ৰতো সোমবাৰে সম্পূৰ্ণ সত্ৰীয়া পৰম্পৰাৰে হোলী গীত গাই বোকাখেল খেলা হয়। ইয়াৰ উপৰিও ঐতিহাসিক চামগুৰি , দক্ষিণ পাট সত্ৰত দৌলগোবিন্দক ৰথত বহুৱাই হোলীগীত গাই পৰিভ্ৰমণ কৰে। আউনীআটী, দক্ষিণপাট, বেঙেনাআটী,গড়মূৰ সত্ৰতো উদযাপন কৰিছে শ্ৰীশ্রীকৃষ্ণৰ দৌলযাত্ৰা মহোৎসৱ।
